JCH—2026: Misr Yangi Zelandiyadan ustun keldi, Kabo-Verde–Urugvay va Eron–Belgiya o‘yinlarida durang qayd etildi
G guruhida Misr 4 ochko bilan peshqadam bo‘lib turibdi, Eron va Belgiya hisobida 2 tadan ochko mavjud, Yangi Zelandiya esa 1 ochko bilan so‘nggi o‘rinda bormoqda.
Futbol bo‘yicha 2026-yilgi Jahon chempionatining G guruhi 2-turidan o‘rin olgan Yangi Zelandiya va Misr terma jamoalari o‘rtasidagi bahs yakunlandi. Murosasiz kechgan uchrashuvda Misr terma jamoasi hisobda ortda borayotganiga qaramay, kambek amalga oshirib, 3:1 hisobida g‘alaba qozondi.
Uchrashuvning 15-daqiqasida Yangi Zelandiya safida Finn Surman gol urib, jamoasini oldinga olib chiqdi.
Ikkinchi bo‘limda esa tashabbus to‘liq Misr terma jamoasi qo‘liga o‘tdi. 59-daqiqada Mostafo Ziko muvozanatni tikladi. Oradan sakkiz daqiqa o‘tib, jamoa sardori Muhammad Saloh raqib darvozasini ishg‘ol qilib, Misrni hisobda oldinga olib chiqdi.
Uchrashuvning 82-daqiqasida Mahmud Trezege tomonidan kiritilgan gol yakuniy natijani o‘rnatdi.
H guruhida Kabo-Verde terma jamoasi Urugvay bilan 2:2 hisobida durang o‘ynagan bo‘lsa, G guruhida Eron va Belgiya terma jamoalari g‘olibni aniqlay olmadi.
AQSHning Mayami shahridagi “Hard Rock” stadionida bo‘lib o‘tgan Urugvay — Kabo-Verde bahsidagi hisob 21-daqiqada Kabo-Verde yarim himoyachisi Kevin Lenini tomonidan ochildi. Birinchi bo‘lim yakunlanishiga yaqin urugvayliklar tashabbusni o‘z qo‘liga oldi. Avvaliga 44-daqiqada Maksimiliano Arauxo muvozanatni tikladi, bo‘limga qo‘shib berilgan 45+6-daqiqada esa Agustin Kanobbio Urugvayni hisobda oldinga olib chiqdi.
Ikkinchi bo‘limda Kabo-Verde taslim bo‘lmadi. 61-daqiqada Elio Varela raqib darvozasini ishg‘ol qilib, hisobni tenglashtirdi. Qolgan daqiqalarda har ikki jamoa g‘alaba golini izlagan bo‘lsa-da, uchrashuv 2:2 hisobidagi durang bilan yakunlandi.
Shu tariqa, Kabo-Verde ketma-ket ikkinchi turda ham favoritlardan ochko tortib oldi. Avvalgi turda jamoa Ispaniya bilan 0:0 hisobida durang o‘ynagandi.
Shuningdek, Kaliforniyaning Inglvud shahrida bo‘lib o‘tgan G guruhi uchrashuvida Eron va Belgiya terma jamoalari 0:0 hisobida durang qayd etdi.
Bahsning 25-daqiqasida Mehdi Taremi tomonidan kiritilgan gol VAR tekshiruvidan so‘ng ofsayd sababli bekor qilindi. 66-daqiqada esa Belgiya himoyachisi Natan Ngoi qizil kartochka olib, maydonni tark etdi va yevropaliklar uchrashuvning qolgan qismini bir kishi kam bo‘lib o‘tkazdi.
Belgiya o‘yin davomida ustunlikka ega bo‘lgan bo‘lsa-da, Eron darvozaboni Alirizo Beyranvand ishonchli harakat qilib, yettita seyv amalga oshirdi va uchrashuvning eng yaxshi futbolchisi deb topildi.
Ikki turdan so‘ng G guruhida Misr 4 ochko bilan peshqadam bo‘lib turibdi. Eron va Belgiya hisobida 2 tadan ochko mavjud, Yangi Zelandiya esa 1 ochko bilan so‘nggi o‘rinda bormoqda.
