Saida Mirziyoyeva “Ostona” xalqaro moliya markazi faoliyati bilan tanishdi
Toshkent xalqaro moliya markazi loyihasi doirasida Qozog‘iston tajribasi o‘rganilmoqda.
O‘zbekiston Prezidenti Administratsiyasi rahbari Saida Mirziyoyeva Qozog‘istonga tashrifi doirasida “Ostona” xalqaro moliya markazi faoliyati bilan tanishdi. Tashrif davomida moliyaviy infratuzilmani rivojlantirish, xorijiy investitsiyalarni jalb etish va xalqaro moliyaviy xizmatlar bozorini kengaytirish borasidagi ilg‘or tajribalar o‘rganilgan.
Saida Mirziyoyeva O‘zbekistonda Toshkent xalqaro moliya markazini tashkil etish bo‘yicha ishlar olib borilayotgan bir paytda Qozog‘istonning mazkur yo‘nalishdagi tajribasini o‘rganish alohida ahamiyat kasb etishini ta’kidlagan.
Qayd etilishicha, “Ostona” xalqaro moliya markazi xorijiy sarmoyalarni jalb qilish, biznes uchun qulay muhit yaratish va xalqaro moliyaviy xizmatlar bozorini rivojlantirishda mintaqaning muhim platformalaridan biri hisoblanadi.
Tomonlar o‘rtasidagi tajriba almashinuvi nafaqat O‘zbekiston va Qozog‘iston, balki butun Markaziy Osiyo mintaqasiga investitsiyalar oqimini kengaytirishga xizmat qilishi ta’kidlandi.
