Toshkentda avtobus piyodani urib yubordi
26 yoshli fuqaro svetoforning taqiqlovchi ishorasida piyodalar yo‘lagidan yugurib o‘tgan.
Toshkent shahrida yo‘lovchi avtobusi ishtirokida piyoda bilan bog‘liq yo‘l-transport hodisasi sodir bo‘ldi. Bu haqda “Toshshahartransxizmat” AJ axborot xizmati ma’lum qildi.
Qayd etilishicha, hodisa 21-iyun kuni soat 21:00 lar atrofida Yakkasaroy tumanidagi Shota Rustaveli ko‘chasida yuz bergan. 38-sonli yo‘nalishda harakatlangan “King Long” rusumli avtobus haydovchisi Janubiy vokzal tomonga ketayotgan vaqtda tartibga solinadigan piyodalar o‘tish joyidan svetoforning taqiqlovchi qizil chirog‘ida yugurib o‘tgan 26 yoshli A.A.ni urib yuborgan.
Ma’lum qilinishicha, avtobus haydovchisi zudlik bilan transport vositasini to‘xtatib, jabrlanuvchini tez tibbiy yordam mashinasida 16-sonli shifoxonaga yetkazgan. Hozircha uning salomatligi yuzasidan ma’lumot berilmagan.
Hodisa Toshkent shahar IIBB mas’ul xodimlari tomonidan belgilangan tartibda rasmiylashtirilib, holat yuzasidan surishtiruv ishlari olib borilmoqda.
Eslatib o‘tamiz, avvalroq poytaxtning Bektemir tumanida “Yutong” elektrobusi orqaga harakatlanayotganda 1991-yilda tug‘ilgan piyodani bosib ketishi oqibatida u voqea joyida halok bo‘lgandi.
