Toshkentda bo‘yoq hididan zaharlangan 3 nafar ishchining hayoti saqlab qolindi
Ular qurilish obyektining 2-qavat pastki yer to‘lasida bo‘yoqlash ishlarini olib borayotgan bo‘lgan.
Toshkent shahrining Mirobod tumanida qurilish obyektining yer to‘lasida ishlayotgan 3 nafar ishchi qutqarib qolindi. Bu haqda Favqulodda vaziyatlar vazirligi xabar berdi.
Ma’lum qilinishicha, 22-iyun kuni soat 18:30 atrofida 112 tizimi orqali Taras Shevchenko ko‘chasida joylashgan qurilishi davom etayotgan binoning ikkinchi qavat pastki yer to‘lasida bo‘yoqlash ishlarini olib borayotgan ishchilarning bo‘yoqdan ajralib chiqqan hiddan ahvoli yomonlashgani haqida xabar kelib tushgan.
Voqea joyiga zudlik bilan yetib borgan Toshkent shahar Favqulodda vaziyatlar bosh boshqarmasi qutqaruvchilari fuqarolarni chuqurdan olib chiqib, ularga birinchi yordam ko‘rsatgan.
Shundan so‘ng ular tez tibbiy yordam xodimlariga topshirilgan.
Qayd etilishicha, qutqaruvchilarning tezkor harakatlari natijasida uch nafar fuqaroning hayoti saqlab qolingan.
