O‘zbekistonning 2 ta qishlog‘i Qirg‘izistonga berildi
O‘zbekistonga ham maydoni jihatidan teng bo‘lgan yer uchastkalari topshirilgani aytilmoqda.
Qirg‘iziston va O‘zbekiston o‘rtasida davlat chegarasini demarkatsiya qilish jarayonlari doirasida Farg‘ona viloyati tarkibida bo‘lgan Cho‘ng‘ara va Tosh-Tepa qishloqlari Qirg‘iziston hududiga o‘tdi. Bu haqda Qirg‘iziston prezidenti matbuot kotibi Asqat Alagozov ma’lum qildi, deya xabar bermoqda 24.kg.
Alagozovning so‘zlariga ko‘ra, mazkur qishloqlarda yashovchi qariyb 2,5 ming nafar etnik qirg‘iz endilikda Qirg‘iziston fuqaroligini oladi.
Ma’lum qilinishicha, buning evaziga Qirg‘iziston tomoni O‘zbekistonga chegara hududida maydoni jihatidan teng bo‘lgan yer uchastkalarini topshirgan.
Shuningdek, Soy va Tayan qishloqlari o‘rtasida avtomobil yo‘lini qurish maqsadida umumiy maydoni 236 gektar bo‘lgan teng qiymatdagi yer uchastkalari ham o‘zaro almashilgan.
Yangi yo‘l foydalanishga topshirilgach, Botken viloyati aholisi Aydarkendan Botkenga 225 kilometrli aylanma yo‘l o‘rniga 55 kilometr masofani bosib o‘tib yetib borishi mumkin bo‘ladi.
Ma’lumot uchun, Qirg‘iziston va O‘zbekiston davlat chegarasining ayrim uchastkalari bo‘yicha shartnoma ikki mamlakat tashqi ishlar vazirlari tomonidan 2022-yil noyabr oyida imzolangan. 2023-yil yanvar oyida esa O‘zbekiston Prezidenti Shavkat Mirziyoyevning Bishkekka davlat tashrifi chog‘ida tomonlar ratifikatsiya yorliqlarini o‘zaro almashgan.
