Rossiyada deputat bolalarni 5-sinfdan harbiy tayyorgarlikka jalb etishni taklif etdi
U mamlakat NATO bilan ehtimoliy qarama-qarshilikka hozirdanoq tayyorlanishi kerakligini ta’kidlagan.
Rossiya Davlat Dumasi deputati Viktor Vodolatskiy mamlakat 2030-yilda NATO va Yevropa Ittifoqi bilan yuzaga kelishi mumkin bo‘lgan harbiy qarama-qarshilikka hozirdanoq tayyorgarlik ko‘rishi kerakligini bildirib, maktablarda boshlang‘ich harbiy tayyorgarlikni kuchaytirishni taklif qildi.
“Abzats” nashriga bergan intervyusida deputat harbiy-sanoat majmuasini rivojlantirish bilan bir qatorda, yosh avlodni ham turli tashqi tahdidlarga tayyorlash zarurligini ta’kidlagan. Uning fikricha, kadet korpuslari tajribasi asosida beshinchi sinfdan boshlab o‘quvchilarga Vatan, oila va milliy manfaatlarni himoya qilishga oid fanlarni o‘qitish lozim.
Biroq ushbu tashabbus Davlat Dumasi qo‘mitalari tomonidan qo‘llab-quvvatlanmagan.
Xususan, Oila himoyasi, otalik, onalik va bolalik qo‘mitasi raisi Nina Ostanina ta’lim dasturida allaqachon “Hayot faoliyati xavfsizligi asoslari” kursi mavjudligini eslatib, unda birinchi tibbiy yordam ko‘rsatish, zamonaviy qurollar va xavfsizlik masalalariga oid bilimlar berilishini qayd etgan.
Uning so‘zlariga ko‘ra, bolalar o‘zlarini himoya qilishga tayyor bo‘lishi zarur, biroq yangi alohida fanni joriy etish maqsadga muvofiq emas.
Davlat Dumasi Ta’lim qo‘mitasi raisining o‘rinbosari Mixail Berulava ham amaldagi dasturlar yetarli ekanini ta’kidlab, qo‘shimcha harbiy tayyorgarlik kurslarini joriy etishga ehtiyoj yo‘qligini bildirgan.
