Banklar omonatlar va yirik pul o‘tkazmalari bo‘yicha ma’lumotlarni Soliq qo‘mitasiga berishi mumkin

Soliq qo‘mitasi banklar va soliq organlari o‘rtasida ma’lumot almashinuvini kengaytirishni nazarda tutuvchi Vazirlar Mahkamasi qarori loyihasini jamoatchilik muhokamasiga taqdim etdi.

 

Hujjatga ko‘ra, soliq organlari jismoniy va yuridik shaxslarning bank hisobvaraqlari hamda omonatlari haqidagi ma’lumotlarni olish imkoniyatiga ega bo‘lishi mumkin. 

 

Shuningdek, fuqarolarning bank kartalariga boshqa jismoniy shaxslarning kartalari yoki elektron hamyonlaridan bir oy davomida bazaviy hisoblash miqdorining 500 baravari — 206 million so‘m va undan ortiq mablag‘ kelib tushgan holatlar to‘g‘risidagi axborot ham Soliq qo‘mitasiga taqdim etilishi rejalashtirilmoqda. Bunda yaqin qarindoshlar o‘rtasidagi pul o‘tkazmalari ushbu tartibga kiritilmaydi.

 

Loyihada banklar tomonidan jismoniy shaxslarning xorijdagi yuridik shaxslarga amalga oshirgan pul o‘tkazmalari haqidagi ma’lumotlarni ham Soliq qo‘mitasiga yetkazish ko‘zda tutilgan. Shu bilan birga, taqdim etiladigan axborotda shaxsga doir ma’lumotlar aks ettirilmaydi.

 

Qaror loyihasiga muvofiq, Soliq qo‘mitasi va O‘zbekiston Respublikasi Markaziy banki ikki oy ichida “Bank-soliq” nomli avtomatlashtirilgan axborot almashish modulini yaratishi kerak. Shundan so‘ng to‘rt oy davomida tijorat banklari axborot tizimlarini ushbu platforma orqali soliq organlari tizimlari bilan integratsiya qilish rejalashtirilgan.

 

Hujjatda qayd etilishicha, mazkur mexanizm prezidentning naqdsiz hisob-kitoblarni kengaytirish, yashirin iqtisodiyot ulushini qisqartirish hamda soliq ma’muriyatchiligini takomillashtirishga oid farmonlari ijrosini ta’minlash maqsadida ishlab chiqilgan.

 

Qaror loyihasi yuzasidan jamoatchilik muhokamasi 8-iyulga qadar davom etadi.