Fransiyada Ebola virusi bilan kasallanishning ilk holat qayd etildi
Bemor bilan aloqada bo‘lgan shaxslar aniqlanib, ularga 21 kun davomida tibbiy kuzatuv ostida bo‘lish va o‘zini izolyatsiya qilish tavsiya etilgan.
Fransiyada Ebola virusini yuqtirish bilan bog‘liq birinchi holat rasman tasdiqlandi. Bu haqda Le Monde nashri mamlakat Sog‘liqni saqlash vazirligi ma’lumotlariga tayanib xabar berdi.
Qayd etilishicha, virus Kongo Demokratik Respublikasida gumanitar missiyada faoliyat yuritgan shifokorda aniqlangan. U Fransiyaga qaytgan zahoti, test natijalari tasdiqlanishidan avval ham ehtiyot chorasi sifatida xavfli infeksiyalarga ixtisoslashgan tibbiyot muassasasiga joylashtirilgan. Hozirda bemorning ahvoli barqaror deb baholanmoqda.
Fransiya sog‘liqni saqlash organlari tomonidan epidemiologik tekshiruv boshlangan. Bemor bilan aloqada bo‘lgan shaxslar aniqlanib, ularga 21 kun davomida tibbiy kuzatuv ostida bo‘lish va o‘zini izolyatsiya qilish tavsiya etilgan.
AFP agentligi xabariga ko‘ra, mamlakat Bosh vaziri Sebastyan Lekornu vaziyatni shaxsan nazoratga olgan. Fransiya rasmiylari sog‘liqni saqlash tizimi bunday xavfli infeksiyalarga qarshi samarali choralar ko‘rishga tayyor ekanini ta’kidlamoqda.
Ebola virusi yuqori o‘lim ko‘rsatkichiga ega bo‘lgan gemorragik isitma kasalligi hisoblanadi. Hozirda Kongo Demokratik Respublikasining sharqiy hududlari, xususan Ituri viloyati epidemiyaning asosiy o‘chog‘i bo‘lib qolmoqda. Rasmiy ma’lumotlarga ko‘ra, mamlakatda 900 dan ortiq tasdiqlangan holat qayd etilgan, 200 dan ortiq bemor vafot etgan. Kasallik Shimoliy Kivu va Janubiy Kivu viloyatlariga, shuningdek, qo‘shni Ugandaga ham tarqalgan.
Jahon sog‘liqni saqlash tashkiloti (JSST) Ebola epidemiyasini xalqaro miqyosda tashvish uyg‘otuvchi sog‘liqni saqlash sohasidagi favqulodda vaziyat sifatida baholab, vaziyat ustidan monitoringni kuchaytirgan.
