Ilon Mask trillioner maqomini yo‘qotdi
Uning sof boyligi 957 milliard dollargacha kamaygan.
Amerikalik milliarder va tadbirkor Ilon Mask qisqa muddat saqlab qolgan trillioner maqomini yo‘qotdi. Bloomberg Billionaires Index ma’lumotlariga ko‘ra, uning sof boyligi 957 milliard dollargacha kamaygan.
Mask joriy yilning 12-iyun kuni tarixda trillion dollarlik boylikka ega bo‘lgan ilk inson sifatida qayd etilgandi. Biroq oradan 12 kun o‘tib, uning aktivlari qiymati pasayishi fonida boyligi yana 1 trillion dollardan pastga tushgan.
Asosiy omillardan biri SpaceX aksiyalarining ketma-ket to‘rt savdo sessiyasi davomida arzonlashgani bo‘ldi. 23-iyun kuni kompaniya aksiyalari 3,9 foizga pasayib, bir dona aksiya narxi 148,57 dollarni tashkil etgan. Natijada kompaniyaning bozor kapitallashuvi 1,99 trillion dollargacha kamaygan. Bu rekord darajadagi IPOdan buyon SpaceX qiymati ilk bor 2 trillion dollardan pastga tushganini anglatadi.
Iyun oyida o‘tkazilgan IPO jarayonida kompaniya 85 milliard dollardan ortiq mablag‘ jalb qilgan edi. O‘shanda SpaceXning bozor qiymati 2,9 trillion dollardan oshib, qisqa muddat ichida Microsoft va Amazon kabi gigant kompaniyalarni ortda qoldirgandi. Ammo keyingi haftalarda kompaniya qiymati qariyb 550 milliard dollarga qisqardi.
Shu bilan birga, Forbes reytingiga ko‘ra, Ilon Maskning boyligi hanuz 1,1 trillion dollar atrofida baholanmoqda. Turli reytinglar o‘rtasidagi tafovut aktivlarni baholash metodologiyasidagi farqlar bilan izohlanmoqda.
