“Xizmat ko‘rsatgan” futbolchilar bilan xayrlashish vaqti keldi” — Alisher Qodirov
Deputat O‘zbekiston terma jamoasi tarkibini yangilash va keyingi jahon chempionati saralashiga mo‘ljallangan jamoani shakllantirish zarurligini ta’kidladi.
Alisher Qodirov O‘zbekiston milliy terma jamoasining o‘yini va kelajakdagi rivojlanishi yuzasidan o‘z fikrlarini bildirdi. Bu haqda u o‘zining Telegram-kanalida ma’lum qilgan.
Qodirovning qayd etishicha, jamoaning natijalari uchun tashqi omillarni sabab qilib ko‘rsatish to‘g‘ri emas. Uning fikricha, maydondagi sharoit har ikki jamoa uchun bir xil bo‘lgan va futbolchilar, avvalo, o‘z sha’ni va g‘ururi uchun kurashishi kerak.
Deputat Kongo bilan bo‘ladigan uchrashuv oldidan futbolchilarni mas’uliyat bilan harakat qilishga chaqirar ekan, ular maydonga muxlislar yoki boshqa omillar uchun emas, eng avvalo o‘zlari uchun tushishi lozimligini ta’kidlagan.
Shuningdek, Alisher Qodirov bosh murabbiy Fabio Kannavaro oldida uzoq muddatli istiqbolni ko‘zlagan yangi tarkibni shakllantirish vazifasi turganini qayd etgan. Uning fikricha, Behruz, Abbos va Abduqodir kabi futbolchilar atrofida nafaqat oldindagi, balki undan keyingi jahon chempionati saralashlarida ham muvaffaqiyatli ishtirok etishga qodir bo‘lgan jamoa shakllantirilishi zarur.
Qodirov darvozabonlar chizig‘ida sezilarli bo‘shliq mavjudligini ham alohida qayd etdi. Uning fikricha, Osiyo kubogida yuqori natijalar haqida o‘ylashdan ko‘ra, mazkur musobaqadan keyingi jahon chempionati saralash bosqichlarida qatnashadigan yangi tarkibni tayyorlash uchun foydalanish maqsadga muvofiq bo‘ladi.
Shu bilan birga, deputat terma jamoa tarkibidagi tajribali futbolchilarga ortiqcha tayanishdan voz kechish va yangi avlod futbolchilariga ko‘proq imkoniyat berish zarurligini ta’kidlagan.
“Osiyoning kuchli jamoalari ma’lum va biz hozircha ularning qatorida emasmiz”, — deya xulosa qilgan Alisher Qodirov.
