Qashqadaryo, Buxoro va Farg‘onada giyohvandlik vositalari savdosiga chek qo‘yildi

 

Davlat xavfsizlik xizmati xodimlari tomonidan Ichki ishlar va Bojxona organlari bilan hamkorlikda giyohvandlik vositalari hamda kuchli ta’sir qiluvchi dori vositalarining noqonuniy aylanmasiga qarshi qaratilgan bir nechta tezkor tadbirlar o‘tkazildi. Bu haqda DXX Zamon.uz' ga xabar berdi.

 

Jumladan, “Qarshi – Toshkent” yo‘nalishida harakatlanayotgan “Cobalt” rusumli avtomashina YPX maskanida to‘xtatilib tekshirilganida, unda yo‘lovchi sifatida ketayotgan Andijon viloyatining Buloqboshi tumanida yashovchi fuqaroning qo‘l sumkasidan jami 5 kilogramm 32 gramm “gashish” giyohvandlik moddasi aniqlanib, ashyoviy dalil sifatida rasmiylashtirib olingan.

 

Yana bir holatda, Buxoro viloyatining G‘ijduvon tumanida istiqomat qiluvchi shaxs o‘z tomorqasida 33 tup “Kannabis” o‘simligini parvarishlayotgani fosh etilgan. Shuningdek, uning yashash manzilidan 7 kilogramm 79 gramm “marixuana” giyohvandlik vositasi ham musodara qilingan.

 

Farg‘ona viloyatida o‘tkazilgan tezkor tadbirda esa “Andijon – Qo‘qon” yo‘nalishida harakatlanayotgan “Lacetti” avtomashinasi to‘xtatilib ko‘zdan kechirilgan. Tekshiruv davomida avtomashinada bo‘lgan fuqarolarga tegishli qoplar ichidan 1200 dona “Tropikamid” kuchli ta’sir qiluvchi dori vositasi aniqlangan.

 

Shuningdek, mazkur shaxslar bilan birga harakatlanayotgan yana bir fuqaro ham qo‘lga olinib, tadbirning davomi sifatida ushbu noqonuniy faoliyatga aloqador bo‘lgan yana ikki nafar shaxs ushlangan. Ulardan jami 345 dona “Tropikamid” hamda 15 dona “Regapen” dori vositalari ashyoviy dalil sifatida olingan.

 

Dastlabki ma’lumotlarga ko‘ra, ushbu shaxslar kuchli ta’sir qiluvchi dori vositalarini Qirg‘izistondan aylanma yo‘llar orqali olib kirib, noqonuniy realizatsiya qilish bilan shug‘ullangan.

 

Mazkur holatlar yuzasidan tegishli moddalarga asosan jinoyat ishlari qo‘zg‘atilib, tergov harakatlari olib borilmoqda.