Samarqandda o‘qituvchilar endi ko‘chalardagi daraxt va trotuarlarni ham kuzatadi

 

Samarqand viloyatida shahar ko‘chalarini oliy ta’lim muassasalariga biriktirish va ularning holatini muntazam monitoring qilib borish bo‘yicha yangi tashabbus ilgari surildi. Bu haqda viloyat hokimi Erkinjon Turdimovning oliy ta’lim muassasalari rektorlari bilan o‘tkazgan uchrashuvida ma’lum qilindi.

 

Uchrashuv davomida yoshlar salohiyatini hududlarni rivojlantirishga yo‘naltirish, shahar infratuzilmasini yaxshilash hamda ko‘kalamzorlashtirish ishlariga ilmiy va tizimli yondashuvlarni tatbiq etish masalalari muhokama qilindi.

 

Viloyat hokimining ta’kidlashicha, har bir oliy ta’lim muassasasiga uning imkoniyati, talabalari soni va hududning hajmidan kelib chiqib bir yoki bir nechta ko‘cha biriktiriladi. Bunda oliygohlardan ko‘chalarni obodonlashtirish yoki moliyalashtirish talab etilmaydi. Ularning asosiy vazifasi ko‘chalar holatini o‘rganish, mavjud muammolarni aniqlash va takliflar ishlab chiqishdan iborat bo‘ladi.

 

Rejaga ko‘ra, biriktirilgan pedagog va talabalar har kuni tegishli ko‘chalarda yurib, hududning tozaligi, daraxt va butalarning holati, sug‘orish tizimi, piyodalar yo‘laklari, yo‘l infratuzilmasi, nogironligi bo‘lgan fuqarolar uchun yaratilgan qulayliklar hamda boshqa dolzarb masalalarni kuzatib boradi.

 

Shuningdek, qayerda daraxtlar quriyotgani, qaysi hududlarda yangi ko‘chat ekish zarurligi, yashil hududlarni qanday tartibda shakllantirish mumkinligi yuzasidan tavsiyalar ishlab chiqiladi. Ko‘chalarni ko‘kalamzorlashtirishda landshaft va dizayn elementlariga ham alohida e’tibor qaratilishi ko‘zda tutilmoqda.

 

Mazkur tashabbus doirasida har bir ko‘cha bo‘yicha alohida “yo‘l xaritasi” ishlab chiqilib, unda mavjud muammolar va ularni bartaraf etish mexanizmlari aks ettiriladi. Aniqlangan kamchiliklar esa obodonlashtirish va kommunal xizmatlar uchun mas’ul tashkilotlarga taqdim etiladi.

 

Viloyat rahbari ushbu yondashuv bir martalik hasharlar amaliyotidan voz kechib, atrof-muhitga doimiy va tizimli g‘amxo‘rlik qilish madaniyatini shakllantirishga xizmat qilishini ta’kidladi. Qayd etilishicha, yosh olimlar, professor-o‘qituvchilar va talabalar salohiyatidan foydalanish orqali shahar muhitini yanada qulay, estetik va zamonaviy ko‘rinishga keltirish mumkin.