Toshkentda avtobusda ayolga shahvoniy shilqimlik qilgan erkak 15 sutkaga qamaldi
U shahvoniy shilqimlik, mayda bezorilik hamda huquqni muhofaza qiluvchi organ xodimlarining qonuniy talablariga bo‘ysunmaslikda aybdor deb topilgan.
Toshkent shahrida jamoat transportida ayolga nisbatan shahvoniy shilqimlik qilgan erkakka nisbatan ma’muriy qamoq jazosi tayinlandi. Bu haqda jinoyat ishlari bo‘yicha Bektemir tuman sudi qarorida ma’lum qilingan.
Sud hujjatlariga ko‘ra, 1976-yilda tug‘ilgan fuqaro 23-iyun kuni soat 07:45 atrofida Bektemir tumani hududida harakatlanayotgan 93-sonli avtobusda yonida o‘tirgan ayolga nisbatan nomunosib xatti-harakatlar sodir etgan. U avval ayolning qo‘liga tegingan, so‘ngra jinsiy a’zosini ochiq holda ko‘rsatgan.
Ma’lum qilinishicha, jabrlanuvchi yordam so‘rab baqirgach, erkak avtobusdan qochib ketishga uringan. Biroq haydovchi transport vositasi eshiklarini yopib qo‘ygan. Shundan so‘ng u janjal ko‘tarib, eshiklarni tepib ochishga harakat qilgan hamda atrofdagilarga nisbatan haqoratli so‘zlar ishlatgan.
Shuningdek, voqea joyiga yetib kelgan ichki ishlar organlari xodimlarining qonuniy talablariga bo‘ysunmay, ularga faol qarshilik ko‘rsatgan.
Sud majlisida fuqaro o‘z aybiga to‘liq iqror bo‘lib, hodisa vaqtida mast holatda bo‘lganini bildirgan. U qilgan ishidan pushaymon ekanini aytib, jabrlanuvchidan uzr so‘ragan.
Sud qarori bilan u shahvoniy shilqimlik, mayda bezorilik hamda huquqni muhofaza qiluvchi organ xodimlarining qonuniy talablariga bo‘ysunmaslikda aybdor deb topilgan. Natijada unga 15 sutka ma’muriy qamoq jazosi hamda 2 million 60 ming so‘m miqdorida jarima tayinlangan.
