Venesuelada kuchli zilzila sodir bo‘ldi: minglab qurbonlar bo‘lishi aytilmoqda
Mamlakatda favqulodda holat eʼlon qilindi. Undan so‘ng Yaponiyada ham yuqori magnitudali zilzila qayd etildi.
Kecha, 24 iyun kuni Venesuelada 7,2 va 7,5 balli ketma-ket ikkita kuchli zilzila yuz berdi.
Ma‘lumotlarga ko‘ra, avval 7,2 magnitudali yer silkinishi qayd etilgan bo‘lsa, oradan atigi 39 soniya o‘tib undan ham kuchliroq — 7,5 magnitudali zilzila yuz bergan.
Kuchli silkinishlar poytaxt Karakas va mamlakatning boshqa yirik shaharlarida keng ko‘lamli vayronagarchiliklarni keltirib chiqardi. Ko‘plab turar joylar va ma‘muriy binolar qulagan, odamlar esa vayronalar ostida qolib ketgan.
Qurbonlar soni 10 mingdan 100 minggacha yetishi mumkinligi taxmin qilinmoqda. Venesuela rasmiylari hozircha halok bo‘lganlar va jabrlanganlar sonini rasman maʼlum qilmagan.
Venesuela prezidenti vazifasini bajaruvchi Delsi Rodriges mamlakatda favqulodda holat eʼlon qildi. U zilzila tufayli Karakas xalqaro aeroporti yopilgani, metro va temir yo‘l qatnovi ham to‘xtatilganini aytdi. Shuningdek, aholini xotirjamlikni saqlashga va shikastlangan binolarni tark etishga chaqirgan.
Mutaxassislar ushbu zilzilani Venesuelada so‘nggi bir asrdan ortiq vaqt ichida kuzatilgan eng kuchli yer silkinishlaridan biri sifatida baholamoqda. Karakas aholisining ko‘pchiligi 1967 yilda sodir bo‘lgan avvalgi vayronkor zilzilani yodga olgan. O‘shanda ham poytaxtda eng ko‘p zarar qayd etilgan. Shaharning Palos Grande va Altamira tumanlarida turar joy binolari qulab tushgan, jami 200 dan ortiq odam halok bo‘lgan.
Venesuladan so‘ng Yaponiya shimoli-sharqida ham 7,2 magnitudali zilzila sodir bo‘ldi. Avvaliga zilzila magnitudasi 6,9 deb baholangan, ammo keyinchalik bu maʼlumot qayta ko‘rib chiqilib, 7,2 magnituda ekani aniqlangan.
Zilzila Ivate prefekturasining Tinch okeani sohillari yaqinida, 44 kilometr chuqurlikda kuzatilgan. Yerosti silkinishlari eng kuchli darajada Aomori prefekturasining Xasikami shahrida sezilgan. Shuningdek, u poytaxt Tokio shahrida ham bilingan.
Xasikami va Xatinoxe shaharlari yong‘in-qutqaruv xizmatlari maʼlumotiga ko‘ra, to‘rt nafar fuqaro yengil jarohatlar bilan shifoxonaga yotqizilgan.
