Chirchiqda Bo‘zsuv kanaliga tushib ketgan fuqaro qutqarib qolindi
Fuqaro ehtiyotsizlik oqibatida kanalga tushib ketgan. Suzishni bilmagani sababli u kuchli suv oqimida oqib ketgan.
Toshkent viloyatining Chirchiq shahrida Bo‘zsuv kanaliga tushib ketgan fuqaro Favqulodda vaziyatlar boshqarmasi qutqaruvchilari tomonidan qutqarib qolindi.
Ma’lum qilinishicha, hodisa 26-iyun kuni soat 09:50 atrofida Chirchiq shahrining “Do‘stlik” mahallasi hududidan oqib o‘tuvchi Bo‘zsuv kanalida sodir bo‘lgan. Kamolot GES xodimlari suv oqimida oqib ketayotgan fuqaroni payqab, bu haqda zudlik bilan Chirchiq shahar Favqulodda vaziyatlar boshqarmasiga xabar bergan.
Xabarga asosan voqea joyiga yetib kelgan qutqaruvchilar suvga sho‘ng‘ib, fuqaroni qirg‘oqqa olib chiqqan.
Jabrlanuvchiga voqea joyining o‘zida birinchi tibbiy yordam ko‘rsatilib, shifokorlar ixtiyoriga topshirilgan. Hozirda uning ahvoli yaxshi ekani bildirilgan.
Dastlabki ma’lumotlarga ko‘ra, fuqaro ehtiyotsizlik oqibatida kanalga tushib ketgan. Suzishni bilmagani sababli u kuchli suv oqimida oqib ketgan.
