Endi boshpana so‘rovchilarga AQSh eshiklari yopiladi
Oq uy boshpana so‘rovchilarni boshqa davlatlarga yo‘naltirishni rejalashtirmoqda.
AQSh siyosiy boshpana so‘rab murojaat qilayotgan xorijiy fuqarolarni qabul qilishni to‘xtatishni rejalashtirmoqda. Bu haqda Oq uy apparati rahbari o‘rinbosari va AQSh prezidenti maslahatchisi Stiven Miller ma’lum qildi deydi TASS.
Uning so‘zlariga ko‘ra, yangi yondashuvga binoan AQSh hududiga boshpana so‘rab kelgan shaxslar mamlakatga qabul qilinmaydi. Buning o‘rniga ular boshpana berishga tayyor boshqa davlatlarga yo‘naltirilishi rejalashtirilmoqda.
Stiven Miller, shuningdek, AQSh–Meksika chegarasida migratsiya nazoratini yanada kuchaytirish zarurligini ta’kidlab, janubiy chegarada berilayotgan boshpana so‘rovlarini tanqid qilgan.
Bundan tashqari, u AQShda vaqtinchalik himoyalangan shaxs maqomiga ega bo‘lgan Gaiti fuqarolarini imkon qadar tezroq o‘z vataniga qaytishga chaqirgan.
Mazkur bayonot AQSh Oliy sudi ma’muriyat foydasiga qaror chiqarganidan so‘ng yangragan. Sud qaroriga ko‘ra, hukumat Suriya va Gaiti fuqarolariga vaqtinchalik himoyalangan shaxs maqomini berishni to‘xtatishi mumkin.
