Ispaniyada jazirama oqibatida to‘rt kunda 200 dan ortiq kishi vafot etdi
Mamlakatda qizil xavf darajasi e’lon qilingan.
Ispaniyada anomal issiq to‘lqini oqibatida so‘nggi to‘rt kun ichida kamida 212 kishi vafot etdi.
Mahalliy sog‘liqni saqlash idoralari ma’lumotlariga ko‘ra, 21–24-iyun kunlari kuzatilgan keskin issiq havo o‘lim holatlarining sezilarli darajada oshishiga sabab bo‘lgan. Bu haqda AFP xabar berdi.
Hozirda Ispaniya, Fransiya hamda Markaziy va G‘arbiy Yevropaning qator davlatlarida anomal issiq sabab eng yuqori — qizil xavf darajasi e’lon qilingan.
Fransiyada ham vaziyat murakkabligicha qolmoqda. Yuqori harorat tufayli daryolar suvi me’yordan ortiq isib ketgani sabab ayrim atom elektr stansiyalarining faoliyati vaqtincha to‘xtatilgan. Shuningdek, jaziramadan qochish maqsadida suv havzalariga kirgan 40 nafardan ortiq kishi cho‘kib halok bo‘lgani ma’lum qilingan edi.
Mutaxassislarning ta’kidlashicha, ekstremal issiq, ayniqsa, keksalar va surunkali kasalliklarga chalingan fuqarolar uchun jiddiy xavf tug‘diradi. Issiq urishi, suvsizlanish hamda yurak-qon tomir kasalliklari oqibatida o‘lim xavfi haroratning me’yordan har bir qo‘shimcha darajaga oshishi bilan taxminan 9–10 foizga ortadi.
Ma'lumot uchun, Ispaniyada 2025-yilda may–sentabr oylaridagi jazirama oqibatida 3 832 kishi vafot etgan. Mamlakatda eng yuqori ko‘rsatkich esa 2022-yilda qayd etilgan bo‘lib, o‘shanda anomal issiq sabab 4 789 kishi hayotdan ko‘z yumgan. So‘nggi o‘n yil davomida esa ekstremal haroratlar oqibatida jami 27 564 nafar fuqaro vafot etgan.
