Oliy toifali o‘qituvchilar maqsadli magistraturaga qabul qilinadi
Maqsadli magistraturaga qabul qilingan oliy toifali o‘qituvchilar o‘qishni ish faoliyatidan ajralmagan holda masofaviy shaklda davom ettiradi.
Hukumatning 2026-yil 24-iyundagi 322-son qarori bilan umumiy o‘rta taʼlim tashkilotlarida faoliyat yuritayotgan oliy malaka toifasiga ega o‘qituvchilarni pedagogika yo‘nalishidagi magistraturaga maqsadli qabul qilish tizimi joriy etildi.
Qarorga ko‘ra, xalqaro akkreditatsiyalangan tizimda oliy malaka toifasiga ega bo‘lgan o‘qituvchilar pedagogika sohasining magistratura bosqichida masofaviy taʼlim shaklida tahsil oladi.
Maqsadli magistraturaga qabul oliy taʼlim muassasalarining magistratura bosqichiga qabul qilish bo‘yicha amaldagi tartib asosida amalga oshiriladi.
Shuningdek, maqsadli magistraturaga qabul qilingan oliy toifali o‘qituvchilar o‘qishni ish faoliyatidan ajralmagan holda masofaviy shaklda davom ettiradi hamda magistraturani tamomlagach, uch yil davomida umumiy o‘rta taʼlim tashkilotlarida ishlash majburiyatini oladi.
Qarorda qayd etilishicha, ushbu tartib asosida maqsadli magistraturaga qabul qilingan o‘qituvchilarga nisbatan Vazirlar Mahkamasining 2022 yil 15 avgustdagi 447-son qarorida nazarda tutilgan to‘lov-kontrakt mablag‘larini Davlat byudjeti hisobidan qoplash shartlari tatbiq etilmaydi.
2026/2027-o‘quv yilidan boshlab oliy toifali o‘qituvchilarni maqsadli magistraturada o‘qitish Nizomiy nomidagi O‘zbekiston milliy pedagogika universitetida yo‘lga qo‘yiladi.
