Venesuelada zilzila qurbonlari soni 920 nafarga yetdi
Zilzilalardan eng ko‘p zarar ko‘rgan hududlarda aholi bedarak yo‘qolgan yaqinlarini o‘z kuchi bilan qidirmoqda.
Venesuelada ketma-ket sodir bo‘lgan kuchli zilzilalar oqibatida halok bo‘lganlar soni kamida 920 nafarga, jarohatlanganlar soni esa 3 360 nafarga yetdi. Bu haqda AP xabar berdi.
Ma’lum qilinishicha, chorshanba kuni kechqurun yuz bergan 7,2 va 7,5 magnitudali zilzilalardan so‘ng eng ko‘p zarar ko‘rgan hududlarda aholi bedarak yo‘qolgan yaqinlarini o‘z kuchi bilan qidirmoqda.
Fuqarolarning ta’kidlashicha, hukumat qutqaruv ishlari faol davom etayotganini bildirayotgan bo‘lsa-da, davlat qutqaruv guruhlari ofat eng og‘ir zarba bergan hududlarga yetarlicha yuborilmagan.
Mutaxassislarning qayd etishicha, zilziladan keyingi dastlabki 48–72 soat vayronalar ostida qolganlarni tirik holda qutqarish uchun eng muhim davr hisoblanadi. Agar jabrlanganlar oziq-ovqat va suv bilan ta’minlangan bo‘lsa, bu muddat biroz uzayishi mumkin.
Ayni paytda Venesuelaga xalqaro yordam ko‘rsatish ishlari jadallashgan. Dunyoning turli mamlakatlaridan 20 dan ortiq qutqaruv guruhi mamlakatga yetib kelgan yoki yaqin kunlarda yetib kelishi kutilmoqda.
Venesuela Milliy assambleyasi prezidenti Xorxe Rodrigesning ta’kidlashicha, “qutqarib qolingan har bir inson — bu mo‘jiza”.
Eslatib o‘tamiz, AQSh ma’muriyati Venesuelada yuz bergan vayronkor zilzilalar oqibatlarini bartaraf etish ishlari uchun 150 million dollar miqdorida gumanitar yordam ajratishini ma’lum qilgandi. Ajratilayotgan mablag‘ favqulodda qidiruv-qutqaruv ishlari, havo transporti orqali yordam yetkazish hamda gumanitar operatsiyalarni muvofiqlashtirishga yo‘naltiriladi.
