AQSh Venesueladagi zilzila oqibatlarini bartaraf etish uchun 150 mln dollar ajratadi
Mablag‘ favqulodda qidiruv-qutqaruv ishlari, havo transporti orqali yordam yetkazish hamda gumanitar operatsiyalarni muvofiqlashtirishga yo‘naltiriladi.
AQSh ma’muriyati Venesuelada yuz bergan vayronkor zilzilalar oqibatlarini bartaraf etish ishlari uchun 150 million dollar miqdorida gumanitar yordam ajratishini ma’lum qildi.
AQSh Davlat departamenti bergan bayonotga ko‘ra, ajratilayotgan mablag‘ favqulodda qidiruv-qutqaruv ishlari, havo transporti orqali yordam yetkazish hamda gumanitar operatsiyalarni muvofiqlashtirishga yo‘naltiriladi.
Ma’lum qilinishicha, yordam paketining 50 million dollari Venesueladagi hamkor tashkilotlarga, 100 million dollari esa BMTning Gumanitar masalalarni muvofiqlashtirish boshqarmasi (OCHA) orqali taqdim etiladi.
Eslatib o‘tamiz, 25–26-iyun kunlari Venesuelada ketma-ket 7,2, 7,5 va 4,5 magnitudali zilzilalar sodir bo‘lgan edi. Tabiiy ofatdan mamlakatning shimolidagi La Guayra shtati eng ko‘p zarar ko‘rdi va hudud favqulodda falokat zonasi deb e’lon qilingan.
Hozirda qutqaruv xizmatlari vayronalar ostida qolganlarni qidirish, jabrlanganlarga yordam ko‘rsatish hamda infratuzilmaga yetkazilgan zararni baholash ishlarini davom ettirmoqda.
Eslatib o‘tamiz, so‘nggi rasmiy ma’lumotlarga ko‘ra, Venesueladagi kuchli zilzilalar oqibatida 235 kishi halok bo‘lgan, 4 300 nafardan ortiq fuqaro jarohat olgan.
