O‘zbekistonda 16 yoshgacha bo‘lgan bolalarning ijtimoiy tarmoqlardan foydalanishi cheklanishi mumkin
Ushbu masala bo‘yicha qonun loyihasini ishlab chiqib, jamoatchilik muhokamasiga qo‘yish ko‘zda tutilmoqda.
O‘zbekistonda 16 yoshgacha bo‘lgan bolalarning ijtimoiy tarmoqlardan foydalanishini qonun bilan cheklashni nazarda tutuvchi qonun loyihasi ishlab chiqilishi mumkin. Bu haqda Maktabgacha va maktab ta’limi vaziri E’zozxon Karimova ma’lum qildi, deya xabar bermoqda Gazeta.uz.
Vazirning aytishicha, mazkur tashabbus yuzasidan parlament deputatlari va senatorlari bilan dastlabki muhokamalar o‘tkazilgan. Endilikda qonun loyihasini ishlab chiqish va uni jamoatchilik muhokamasiga taqdim etish rejalashtirilmoqda.
“Biz ham hozir ushbu masalani o‘ylayapmiz. Bu bo‘yicha deputatlarimiz va senatorlarimiz bilan ham gaplashdik. Qonun loyihasini ishlab chiqib, jamoatchilik muhokamasiga qo‘ymoqchimiz. Bu tartib bizda ham bo‘lishi kerak, deb o‘ylayman”, — dedi vazir.
Shuningdek, E’zozxon Karimova bolalarni mobil telefondan to‘liq voz kechishga majbur qilishning imkoni yo‘qligini, biroq undan foydalanish madaniyati va me’yorini shakllantirish zarurligini ta’kidladi.
Uning qayd etishicha, maktablarga telefon olib kirish tartibi bo‘yicha tegishli buyruq va odob-axloq qoidalari mavjud. Biroq ayrim ta’lim muassasalarida ushbu talablar to‘liq ishlamayotgani sababli ularning ijrosini kuchaytirish hamda 16 yoshgacha bo‘lgan bolalarning ijtimoiy tarmoqlardan foydalanishini qonun bilan cheklash masalasi ko‘rib chiqilmoqda.
