O‘zbekistonda ro‘yxatdan o‘tmagan kosmetika preparatlaridan foydalanganlarda botulizm aniqlandi

Farmatsevtika mahsulotlari xavfsizligi markazi ma’lum qilishicha, Respublika ixtisoslashtirilgan epidemiologiya, mikrobiologiya, yuqumli va parazitar kasalliklar ilmiy-amaliy tibbiyot markazi klinikasiga murojaat qilgan ayrim bemorlarda “Refinex Botulinum Toxin Type A for Therapy” hamda “Dysport 500 Clostridium botulinum type A toxin-haemagglutinin complex” preparatlari kosmetologik maqsadlarda qo‘llanganidan so‘ng og‘ir nojo‘ya reaksiyalar qayd etilgan. Ularda botulizmga xos klinik belgilar ham kuzatilgan.

 

Qayd etilishicha, ayni paytda mazkur mahsulotlarning kelib chiqishi hamda ularning qonuniy muomalasi bilan bog‘liq holatlar yuzasidan tegishli tekshiruv ishlari olib borilmoqda.

 

Markazning ta’kidlashicha, ushbu ikki preparat O‘zbekiston Respublikasida davlat ro‘yxatidan o‘tkazilmagan. Shu sababli ularning xavfsizligi, sifati va samaradorligi belgilangan tartibda baholanmagan.

 

Shu munosabat bilan fuqarolarga internet va ijtimoiy tarmoqlar orqali taklif etilayotgan shubhali preparatlarni xarid qilmaslik tavsiya etildi. Agar bunday mahsulotlar xarid qilingan bo‘lsa, ularni qo‘llamaslik, foydalanish boshlangan bo‘lsa esa darhol to‘xtatib, shifokorga murojaat qilish so‘ralgan.

 

Shuningdek, mazkur preparatlarni qo‘llagan shaxslarda ko‘rishning xiralashishi, qovoqlarning tushib qolishi, yutinish yoki nutqning buzilishi, mushaklar kuchsizligi, nafas olish qiyinlashishi kabi alomatlar kuzatilsa, zudlik bilan tibbiy yordamga murojaat qilish zarurligi ta’kidlandi.

 

Farmatsevtika mahsulotlari xavfsizligi markazi fuqarolarni dori vositalarini faqat rasmiy savdo tarmoqlari orqali xarid qilishga hamda shubhali mahsulotlar aniqlangan taqdirda vakolatli organlarga xabar berishga chaqirdi.

 

Qayd etilishicha, mazkur holat yuzasidan nazorat va o‘rganish ishlari davom etmoqda.