Qirg‘izistonda Islom Karimovga haykal qo‘ygan bo‘lardim — Asqar Akayev

Qirg‘izistonning birinchi prezidenti Asqar Akayev O‘zbekistonning marhum prezidenti Islom Karimov davridagi yopiq siyosat Qirg‘iziston va Qozog‘iston tadbirkorlari uchun imkoniyat yaratganini aytdi. Bu haqda u yaqinda e’lon qilingan podkastda so‘z yuritdi, deya yozmoqda BBC.

 

Akayevning fikricha, agar O‘zbekiston o‘sha davrda hozirgi kabi tashqi dunyoga ochiq bo‘lganida, qirg‘iz tadbirkorlari o‘zbek biznesi bilan raqobatlasha olmagan bo‘lardi.

 

“Hammamiz Islom Karimovdan minnatdor bo‘lishimiz kerak. U O‘zbekistondagi o‘zbeklarni dunyodan uzib qo‘ydi. Shu orqali u qirg‘izlar va qozoqlar uchun imkoniyatlar yaratdi. Buning uchun men Islom Karimovga Qirg‘izistonda haykal qo‘ygan bo‘lardim” — dedi u.

 

Podkast davomida Akayev Janubiy Koreyaning Daewoo kompaniyasining Markaziy Osiyodagi investitsiyalari haqida ham fikr bildirdi. Uning aytishicha, kompaniya dastlab Qirg‘izistonda avtomobil zavodi qurishni ham ko‘rib chiqqan, biroq keyinchalik investitsiya uchun O‘zbekiston tanlangan.

 

Sobiq prezidentning so‘zlariga ko‘ra, u keyinchalik bu masalani Islom Karimov bilan ham muhokama qilgan.

 

“Bunday ishlab chiqarish na o‘zbekka, na qirg‘izga kerak. Men hatto keyin Islom Karimovdan so‘raganman. U ham bu qaror xato bo‘lganini aytgan”, — dedi Akayev.

 

Akayevning fikricha, Karimov davridagi iqtisodiy va tashqi siyosatning nisbatan yopiq modeli Qirg‘iziston va Qozog‘iston tadbirkorlari uchun qo‘shimcha imkoniyat yaratgan. Shu bilan birga, BBC ayrim iqtisodchilar bu qarashlarga qo‘shilmasligini ham keltiradi.

 

Xususan, ismi oshkor etilmagan iqtisodiy tahlilchi yirik sanoat loyihalarini faqat daromad nuqtayi nazaridan baholab bo‘lmasligini, O‘zbekistonda avtomobil zavodi qurilishi uzoq muddatli sanoat rivoji uchun muhim qaror bo‘lganini ta’kidlagan. Uning fikricha, yuzaga kelgan muammolar asosan boshqaruv va korrupsiya bilan bog‘liq bo‘lgan.

 

Shuningdek, BBC suhbatlashgan yana bir manba Akayevning bayonoti O‘zbekiston va Qirg‘iziston o‘rtasidagi hamkorlik masalalari muhokama qilinayotgan davrga to‘g‘ri kelganiga e’tibor qaratib, bunday chiqishlar ortida siyosiy yoki geosiyosiy hisob-kitoblar bo‘lishi ehtimolini ham istisno qilmagan.