Rossiyada migrantlar uchun davlat bojlari bir necha barobarga oshiriladi
Fuqarolik, yashash guvohnomasi va vizalarni rasmiylashtirish uchun davlat bojlari bir necha barobarga ko‘tariladi.
Rossiya prezidenti Vladimir Putin migratsiya sohasidagi davlat bojlari miqdorini bir necha barobarga oshirishni nazarda tutuvchi qonunni imzoladi. Bu haqda TASS xabar berdi.
Qonunga ko‘ra, Rossiya fuqaroligini olish yoki undan chiqish uchun davlat boji 4,2 ming rubldan 50 ming rublgacha oshiriladi. Yashash guvohnomasini rasmiylashtirish boji esa 6 ming rubldan 30 ming rublgacha ko‘tariladi.
Shuningdek, yashash guvohnomasini almashtirish uchun 6 ming rubl, vaqtinchalik yashash ruxsatnomasi yo‘qolgan, shikastlangan yoki shaxsni tasdiqlovchi hujjat almashtirilgan taqdirda yangi hujjat rasmiylashtirish uchun 5 ming rubl davlat boji undiriladi.
Rossiyaga kirish uchun taklifnoma rasmiylashtirish boji har bir taklif etilgan shaxs uchun 960 rubldan 8 ming rublgacha oshiriladi. Rossiyaga kirish va undan chiqish vizasi uchun davlat boji 1,2 ming rubldan 2 ming rublgacha, ko‘p martalik viza uchun esa 1,92 ming rubldan 6 ming rublgacha ko‘tariladi.
Bundan tashqari, vaqtinchalik yashash ruxsatnomasini rasmiylashtirish boji 1,92 ming rubldan 15 ming rublgacha oshiriladi. Ta’lim olish maqsadida kirish vizasi uchun davlat boji 8 ming rubl etib belgilangan. Chet ellik ishchilarni jalb qilish uchun ruxsatnoma boji ham 12 ming rubldan 15 ming rublgacha ko‘paytiriladi.
Qonunga muvofiq, Rossiya manfaatlariga xizmat qiluvchi xorijiy mutaxassislar, olimlar, madaniyat arboblari va boshqa ayrim toifadagi shaxslar hamda ularning oila a’zolari vaqtinchalik yashash ruxsatnomasi va yashash guvohnomasini rasmiylashtirish uchun davlat boji to‘lashdan ozod etiladi.
Shuningdek, sobiq SSSR fuqarolari, xorijdan Rossiyaga ko‘chib kelishni qo‘llab-quvvatlash davlat dasturi ishtirokchilari va ularning oila a’zolari, shuningdek, Ukrainadagi urush davrida kamida bir yil muddatga Rossiya armiyasi bilan shartnoma tuzgan xorijliklar va ularning oila a’zolari ham ayrim davlat bojlaridan ozod qilinadi. Qonun rasmiy e’lon qilinganidan bir oy o‘tib kuchga kiradi.
Avvalroq, Rossiyadagi “Adolatli Rossiya” partiyasi yetakchisi Sergey Mironov migrantlarning xalqaro pul o‘tkazmalaridan 3 foizlik komissiya undirishni taklif qilgandi. Mazkur tashabbus partiya deputatlari tomonidan qonun loyihasi sifatida Davlat Dumasiga kiritilgan.
