Fransiyada jazirama oqibatida o‘lim ko‘rsatkichlari keskin oshdi
Mamlakat sog‘liqni saqlash agentligi 24-iyundan buyon odatdagi davrga nisbatan qariyb mingta ko‘proq o‘lim qayd etilganini ma’lum qildi.
Fransiyada bir necha kundan buyon davom etayotgan rekord darajadagi issiq oqibatida o‘lim ko‘rsatkichlari keskin oshdi. Bu haqda DW xabar berdi.
Mamlakatning Santé publique France agentligi ma’lumotiga ko‘ra, 24-iyundan buyon odatdagi davrga nisbatan qariyb 1 mingta ko‘proq o‘lim qayd etilgan. Idora bu ma’lumotlar hali yakuniy emasligini bildirgan.
Ma’lum qilinishicha, 24-iyun kuni mamlakatda barcha sabablarga ko‘ra 1 200 nafardan ortiq, 25 va 26-iyun kunlari esa 1 400 nafardan ortiq o‘lim holati qayd etilgan. Taqqoslash uchun, aprel va may oylarida Fransiyada kuniga o‘rtacha 900–1 000 kishi vafot etgan.
Sog‘liqni saqlash agentligi o‘limlar soni ayniqsa «qizil» xavf darajasi e’lon qilingan hududlarda keskin oshganini ma’lum qildi. Qayd etilishicha, vafot etganlarning 85 foizini 65 yosh va undan katta fuqarolar tashkil etadi. Shu bilan birga, o‘lim ko‘rsatkichlari barcha yosh guruhlarida oshgani qayd etilgan.
28-iyun kuni mamlakatning aksariyat hududlarida havo harorati pasaya boshladi. Biroq mutaxassislar issiq to‘lqinining salbiy oqibatlari hali bir necha kun davom etishi mumkinligini ta’kidlamoqda.
Ayni paytda Germaniyada ham rekord darajadagi issiq kuzatildi. Germaniya meteorologiya xizmati ma’lumotiga ko‘ra, 27-iyun kuni Saksoniya-Anhalt federal yeridagi Drevits aholi punktida havo harorati 41,5 daraja Selsiyga yetib, mamlakat tarixidagi eng yuqori ko‘rsatkich qayd etildi.
