Toshkentning ayrim hududlarida elektr ta’minotida uzilish kuzatildi
Uzilishga “Yuksak” podstansiyasidagi nosozlik sabab bo‘lgan va natijada 110 kV kuchlanishli ikkita elektr uzatish tarmog‘i favqulodda o‘chib qolgan.
28-iyun kuni soat 20:45 da Toshkent shahridagi "Yuksak" podstansiyasida yuzaga kelgan nosozlik sabab poytaxt va Toshkent viloyatining ayrim hududlarida elektr ta’minotida uzilishlar kuzatildi.
Energetika vazirligi ma’lumotiga ko‘ra, hodisa oqibatida Toshkent shahrining Mirobod, Chilonzor va Yakkasaroy, shuningdek, Toshkent viloyatining Zangiota tumanlarining ayrim hududlari vaqtincha elektr energiyasisiz qolgan.
"Toshkent shahar magistral elektr tarmoqlari" korxonasi aniqlik kiritishicha, "Yuksak" podstansiyasidan chiquvchi L-O‘-Yu 110 kV 1 va 2 elektr uzatish tarmoqlarida himoya tizimi ishga tushishi oqibatida favqulodda o‘chish sodir bo‘lgan. Natijada "Yurtim" va "Bunyodkor" podstansiyalari to‘liq kuchlanishsiz qolgan. Shu sababli Mirobod, Yakkasaroy, Chilonzor va Uchtepa tumanlarining ayrim hududlarida elektr ta’minoti uzilgan.
Mutaxassislar tomonidan amalga oshirilgan tezkor qayta ulash ishlari natijasida 220/110/10 kV kuchlanishli "Ozodlik" podstansiyasi orqali Chilonzor va Uchtepa tumanlaridagi iste’molchilarning elektr ta’minoti bosqichma-bosqich tiklana boshlagan.
Hozirda maxsus brigadalar nosozlik sabablarini aniqlash va bartaraf etish, shuningdek, qolgan iste’molchilarni elektr energiyasi bilan to‘liq ta’minlash bo‘yicha ishlarni davom ettirmoqda.
