Qirg‘iziston va Qozog‘iston bir-biriga 49 yilga yer uchastkalari beradi

Qozog‘iston Senati Qirg‘iziston bilan elchixonalar va favqulodda hamda muxtor elchilar qarorgohlarini joylashtirish uchun yer uchastkalari va binolarni o‘zaro ajratish to‘g‘risidagi qonunni ma’qulladi. Bu haqda Tengrinews.kz xabar berdi.

 

Qonunga ko‘ra, ikki davlat o‘z poytaxtlarida elchixonalar hamda elchilar qarorgohlarini joylashtirish uchun binolar va yer uchastkalarini o‘zaro bepul foydalanishga beradi. Hujjatning maqsadi diplomatik vakolatxonalar faoliyati uchun o‘zaro manfaatdorlik va teng huquqlilik tamoyillari asosida qulay sharoit yaratishdan iborat. Tomonlarga ko‘chmas mulklar 49 yil muddatga beriladi.

 

Qozog‘iston Qirg‘izistonga Ostonada elchixona qurilishi uchun 0,74 gektar yer uchastkasi va elchi qarorgohi uchun 1 267 kvadrat metr maydonga ega alohida kottej ajratadi.

 

Qirg‘iziston esa Qozog‘istonga Bishkekda elchixona joylashtirish uchun 0,75 gektar yer uchastkasi hamda elchi qarorgohi uchun 531 kvadrat metr maydonga ega kottej beradi. Har bir obyekt alohida hudud bilan ta’minlanadi.

 

Senat deputati Andrey Lukinning ma’lum qilishicha, mazkur ko‘chmas mulklar har ikki davlatda barcha turdagi soliq va yig‘imlardan ozod etiladi. Binolarni qurish, ta’mirlash, saqlash va kommunal xizmatlar xarajatlari esa mezbon davlatdagi amaldagi tariflar asosida tomonlarning o‘zi tomonidan qoplanadi.

 

Ma’lumot uchun, 2025-yil mart oyida Qozog‘iston Majilisi AQSH bilan Ostona shahrida diplomatik obyekt qurilishi uchun 70,6 ming kvadrat metr yer uchastkasini 49 yil muddatga ijaraga berish to‘g‘risidagi bitimni ham ma’qullagan edi. 

 

Mazkur bitimga ko‘ra, AQSH yer uchastkasi ijarasi uchun 25,3 million dollarni bitim kuchga kirganidan keyin 30 kun ichida bir martalik to‘lov sifatida amalga oshiradi.