Saudiya Arabistoni Futbol Federatsiyasi prezidenti iste’foga chiqdi

 

Saudiya Arabistoni Futbol Federatsiyasi prezidenti Yosir Al-Mishal milliy terma jamoaning 2026-yilgi FIFA Jahon chempionatidagi muvaffaqiyatsiz ishtiroki ortidan lavozimini tark etishini ma’lum qildi. Bu haqda Reuters xabar berdi.

 

Al-Mishal bayonotida federatsiya rahbariyati Saudiya futbolini rivojlantirish va muxlislar kutgan natijalarga erishish uchun barcha imkoniyatlarni ishga solganini, biroq terma jamoaning pley-off bosqichiga chiqa olmagani umumiy maqsadlarga mos kelmasligini ta’kidlagan.

 

“Milliy terma jamoaning Jahon chempionatining keyingi bosqichiga chiqa olmagani bizning umumiy ambitsiyalarimizga mos kelmaydi. Buning uchun to‘liq javobgarlikni o‘z zimmamga olaman va muxlislardan uzr so‘rayman”, — degan Al-Mishal.

 

Uning so‘zlariga ko‘ra, mas’uliyat yangi bosqich uchun imkoniyat yaratishni talab qiladi. Shu sababli u amaldagi vakolat muddati yakunlanishini kutmasdan lavozimini tark etishga qaror qilgan. Endilikda amaldagi tartib-qoidalarga muvofiq, Saudiya Arabistoni Futbol Federatsiyasining yangi rahbariyatini saylash jarayoni boshlanadi.

 

Yosir Al-Mishal lavozimini tark etayotgan bo‘lsa-da, Saudiya sportini rivojlantirish yo‘lida faoliyatini davom ettirishini bildirib, futbol jamoatchiligi va muxlislarga qo‘llab-quvvatlagani uchun minnatdorlik izhor qilgan.

 

Ma'lumot uchun, Saudiya Arabistoni terma jamoasi 2026-yilgi Jahon chempionati guruh bosqichida 2 ochko jamg‘arib, o‘z guruhida so‘nggi o‘rinni egalladi va pley-off yo‘llanmasini qo‘lga kirita olmadi.

 

Eslatib o'tamiz, avvalroq Janubiy Koreya milliy terma jamoasi bosh murabbiyi 2026-yilgi FIFA Jahon chempionatida jamoa muvaffaqiyatsiz ishtirok etgani ortidan lavozimini tark etishi haqida xabar berilgan edi.