Жанубий Корея терма жамоаси бош мураббийи истеъфога чиқди
Мураббий жамоа мундиал плей-оффига чиқа олмагани учун масъулиятни ўз зиммасига олиб, мухлислардан узр сўради.
Жанубий Корея миллий терма жамоаси бош мураббийи Хонг Мён Бо 2026 йилги ФИФА Жаҳон чемпионатида жамоа муваффақиятсиз иштирок этгани ортидан лавозимини тарк этишини маълум қилди. Бу ҳақда Yonhap маълум қилди.
Мураббий оммавий ахборот воситаларига берган баёнотида мухлислардан узр сўраб, натижалар учун тўлиқ масъулиятни ўз зиммасига олишини таъкидлаган.
“Бугун Жанубий Корея эркаклар терма жамоаси бош мураббийи лавозимидан кетаётганимни эълон қиламан. Миллий жамоани қўллаб-қувватлаган барча мухлислардан узр сўрайман. Биз кутилган натижага эриша олмадик ва бунинг учун барча жавобгарлик менга тегишли”, — деган Хонг Мён Бо.
57 ёшли мутахассиснинг амалдаги шартномаси 2027 йилгача мўлжалланган эди. Бироқ терма жамоанинг Жаҳон чемпионатидаги муваффақиятсиз иштироки ортидан у муддатидан аввал истеъфога чиқишга қарор қилган.
Жанубий Корея терма жамоаси гуруҳ босқичини 3 очко билан учинчи ўринда якунлаб, плей-офф босқичига йўл ола олмади. Жамоа гуруҳ баҳсларида Чехияни 2:1 ҳисобида мағлуб этган бўлса, Мексика ва Жанубий Африкага 0:1 ҳисобида имкониятни бой берди.
Маълумот учун, Жанубий Корея тарихда 12 марта FIFА Жаҳон чемпионатида иштирок этган илк Осиё терма жамоаси ҳисобланади. 2026 йилги мундиал эса АҚШ, Канада ва Мексика мезбонлигида 48 та терма жамоа иштирокида ўтказилмоқда.
