Toshkentdagi avtomobil ehtiyot qismlari bozorida tovlamachilik qilgan 14 kishi qamaldi
Jinoiy guruh mijozlarning roziligisiz xizmat ko‘rsatgan jinoiy guruh ulardan katta miqdorda pul talab qilgan, rad javobi berganlarga tahdid qilgan.
Toshkent shahrining Uchtepa tumanidagi “Avtomobil ehtiyot qismlari” bozori hududida tovlamachilik bilan shug‘ullangan jinoiy guruh a’zolariga nisbatan sud hukmi chiqarildi.
Toshkent shahar sudlari ma’lum qilishicha, 29-iyun kuni Jinoyat ishlari bo‘yicha Uchtepa tuman sudida mazkur jinoyat ishi yuzasidan hukm e’lon qilinib, 14 nafar sudlanuvchiga 3 yildan 6 yil 6 oygacha ozodlikdan mahrum etish jazosi tayinlandi.
Qayd etilishicha, ayrim sudlanuvchilar muqaddam sudlanganligi sababli jazoni qattiq tartibli, qolganlari esa umumiy tartibdagi koloniyalarda o‘tashi belgilangan.
Tergov materiallariga ko‘ra, jinoiy guruh a’zolari mijozlarning roziligisiz avtomobillariga turli ehtiyot qismlari va jihozlarni o‘rnatib, keyinchalik ular uchun sun’iy ravishda oshirilgan narxlarda pul talab qilgan. Xususan, bozor qiymati 600 AQSH dollari bo‘lgan xizmat uchun fuqarodan 13 ming 300 AQSH dollari undirishga uringan hamda rad javobini bergan mijozni qo‘rqitish orqali bosim o‘tkazgan.
Yana bir holatda esa ular boshqa bir fuqaroning avtomobiliga uning roziligisiz ehtiyot qismlarini o‘rnatib, avtomobil kalitini olib qo‘ygan holda bosim o‘tkazish orqali 15 million so‘m undirgani aniqlangan.
Sud majlisi yakunida hukm mazmuni hamda uni belgilangan tartibda shikoyat qilish muddati va tartibi sudlanuvchilarga tushuntirildi.
