O‘zbekiston aholisi rasman 39 million nafardan oshdi
Mamlakat aholisi joriy statistik hisob-kitoblardan 810 ming nafarga ko‘proq ekani aniqlandi.
Aholi va qishloq xo‘jaligini ro‘yxatga olish tadbirining dastlabki natijalariga ko‘ra, O‘zbekiston aholisi soni 39 million 47 ming 321 nafarga yetdi.
Ma’lum qilinishicha, joriy statistik hisob-kitoblarga ko‘ra mamlakat aholisi 38 million 236 ming 704 nafar deb baholangan bo‘lsa, ro‘yxatga olish yakunlariga ko‘ra ushbu ko‘rsatkich 810,6 ming nafarga ko‘proq ekani aniqlangan.
Shuningdek, 1989-yilda o‘tkazilgan so‘nggi aholini ro‘yxatga olish natijalari bilan taqqoslaganda, O‘zbekiston aholisi soni qariyb ikki barobarga oshgani qayd etilgan.
Bundan tashqari, dastlabki ma’lumotlarga ko‘ra, O‘zbekiston hududida bir yildan ortiq muddat yashayotgan 56 ming 860 nafar xorijiy fuqaro ro‘yxatga olingan. Ularning 19 ming 300 nafari Toshkent shahrida istiqomat qilmoqda.
Davlatlar kesimida eng ko‘p ro‘yxatga olingan xorijiy fuqarolar quyidagilar:
-
Hindiston — 13 312 nafar;
-
Rossiya — 10 826 nafar;
-
Qozog‘iston — 9 425 nafar;
-
Tojikiston — 5 722 nafar;
-
Turkmaniston — 5 347 nafar;
-
Qirg‘iziston — 4 397 nafar;
-
Pokiston — 1 433 nafar;
-
Xitoy — 1 031 nafar;
-
Turkiya — 811 nafar;
-
Janubiy Koreya — 691 nafar;
-
Boshqa davlatlar — 3 865 nafar.
