O‘zbekistonda AI-92 benzini narxi rekord darajada qimmatladi
Respublika tovar-xomashyo birjasida AI-92 markali avtomobil benzini narxi bir tonna uchun qariyb 14 mln so‘mga yetdi.
O‘zbekiston respublika tovar-xomashyo birjasida AI-92 markali avtomobil benzini narxi tarixiy rekordni yangiladi. Bu haqda Spot nashri birja savdolari ma’lumotlariga tayanib xabar berdi.
29-iyun kuni AI-92 benzini bir tonnasining narxi 13,919 mln so‘mni tashkil etdi. Bu avvalgi savdo kuniga nisbatan 1,1 foizga yuqori bo‘lib, birja tarixidagi eng yuqori ko‘rsatkich sifatida qayd etildi.
Ma’lumotlarga ko‘ra, iyun oyi boshidan buyon AI-92 benzini narxi 1,473 mln so‘mga yoki qariyb 11,8 foizga oshgan.
Narxlarning eng keskin o‘sishi oyning birinchi yarmida kuzatilgan. Xususan, 4-iyun kuni bir tonna benzin 12,476 mln so‘mdan sotilgan bo‘lsa, 8-iyunga kelib uning narxi atigi to‘rt kun ichida 10,5 foizga oshib, 13,788 mln so‘mga yetgan. Keyingi ikki hafta davomida narx 13,7–13,8 mln so‘m oralig‘ida shakllanib turgan, 29-iyun kuni esa yana ko‘tarilib, yangi tarixiy maksimumni qayd etgan.
Narxlarning o‘sishi fonida birjadagi yoqilg‘i taklifi ham qisqargan. Agar 1-iyun kuni savdolarga 3 791 tonna AI-92 benzini chiqarilgan bo‘lsa, 23-iyunga kelib bu ko‘rsatkich deyarli ikki barobarga kamayib, 1 898 tonnani tashkil etgan. 29-iyun holatiga taklif hajmi 3 123,2 tonnagacha tiklangan bo‘lsa-da, bu narxlarning pasayishiga ta’sir ko‘rsatmagan.
Spot qayd etishicha, narxlarning keskin oshishi Rossiyada yoqilg‘i tanqisligi yuzaga kelgan davrga to‘g‘ri kelgan. Bunga Ukraina dronlari hujumlaridan so‘ng ayrim neftni qayta ishlash zavodlarida rejadan tashqari ta’mirlash ishlari olib borilgani sabab bo‘lgan.
