Qashqadaryoda maktabga kirish imtihonlari testlari tarqaldi

 

Ixtisoslashtirilgan ta’lim muassasalari agentligi Qashqadaryo viloyatida 2026/2027-o‘quv yili uchun o‘tkazilgan kirish imtihonlari jarayonida test materiallari noqonuniy tarqatilgani yuzasidan rasmiy munosabat bildirdi.

 

Agentlik ma’lum qilishicha, 29-iyun kuni 5-sinfga kirish imtihonlarining 1-variant test topshiriqlari imtihon o‘tkazilayotgan hududdan noqonuniy ravishda olib chiqilib, uchinchi shaxslarga tarqatilgani aniqlangan.

 

Mazkur holat yuzasidan belgilangan tartibda huquqni muhofaza qiluvchi organlarga xabar berilgan. Hozirda voqea yuzasidan vakolatli idoralar tomonidan qonunchilikka muvofiq o‘rganish ishlari olib borilmoqda.

 

Dastlabki ma’lumotlarga ko‘ra, ushbu holat ayrim shaxslarning belgilangan tartibni buzgan noqonuniy harakatlari oqibatida yuzaga kelgan.

 

Agentlikning ta’kidlashicha, bir kunda bir necha smenada o‘tkaziladigan imtihonlarda barcha talabgorlar uchun teng va adolatli sharoit yaratish maqsadida har bir smena uchun test variantlari alohida ishlab chiqiladi. Test topshiriqlari mazmunan mustaqil bo‘lib, savollar va javob variantlari takrorlanmaydi.

 

Shuningdek, ota-onalar farzandlarini halollik, qonunlarga hurmat va o‘z bilimiga ishonish ruhida tarbiyalashga chaqirilgan. Agentlik imtihon materiallarini noqonuniy olib chiqish, tarqatish yoki ulardan noqonuniy foydalanish amaldagi qonunchilikka muvofiq javobgarlikka sabab bo‘lishini eslatgan.

 

Qayd etilishicha, kirish imtihonlari respublika bo‘ylab bir vaqtda boshlanib, bir vaqtda yakunlanadi. Agentlik barcha imtihonlarning ochiq, shaffof va adolatli o‘tishini hamda har bir talabgorning bilimi xolis baholanishini ta’minlash tamoyiliga qat’iy amal qilishini bildirgan.