Qirg'izistondagi maktablar 12 yillik ta'lim tizimiga o'tdi
Yangi tartibga ko‘ra, umumiy ta’lim 6+3+3 modeli asosida 12 yil davom etadi.
Qirg‘iziston hukumati umumiy o‘rta ta’lim tizimini 12 yillik modelga o‘tkazishni rasman tasdiqladi. Shu munosabat bilan umumiy ta’lim tashkilotlari faoliyatini tartibga soluvchi namunaviy nizomga tegishli o‘zgartirishlar kiritildi. Bu haqda Sputnik.kg xabar berdi.
Yangi tartibga ko‘ra, umumiy ta’limning birinchi bosqichi 6 yil, ikkinchi bosqichi 3 yil va uchinchi bosqichi yana 3 yil davom etadi. Shu tariqa, maktab ta’limining umumiy muddati 12 yilni tashkil etadi.
Shuningdek, o‘quv yilining davomiyligi kamida 34 hafta etib belgilandi. Bunda 1-sinf o‘quvchilari uchun o‘quv yili 32 hafta, 2-sinf o‘quvchilari uchun esa 33 hafta davom etadi.
Yangi nizomga muvofiq, maktab ta’tillarining umumiy davomiyligi kamida 30 kunni, yozgi ta’til esa kamida 14 haftani tashkil etadi.
Qayd etilishicha, mazkur islohot umumiy ta’lim muassasalarida o‘quv yilining optimal davomiyligini belgilash hamda o‘quv yuklamasini oqilona taqsimlash maqsadida amalga oshirilmoqda.
Hukumat qarori rasmiy e’lon qilingan kundan boshlab 10 kun o‘tib kuchga kiradi.
