Navoiyda haydovchi transport nazorati inspektoriga pora taklif qildi
Ma’muriy bayonnoma rasmiylashtirilmasligi evaziga pora bermoqchi bo‘lgan erkakka jinoyat ishi qo‘zg‘atildi.
Navoiy viloyatida Transport nazorati inspeksiyasi xodimiga pora taklif qilgan haydovchiga nisbatan jinoyat ishi qo‘zg‘atildi. Bu haqda Transport nazorati inspeksiyasi xabar berdi.
Ma’lum qilinishicha, Transport nazorati inspeksiyasining Avtomobil transportida nazorat qilish Navoiy viloyati hududiy bo‘limi inspektorlari xizmat vazifasini bajarish chog‘ida Karmana tumanidagi “Samarqand” YPX maskanida “FAW” rusumli yuk avtomobilini tekshirish uchun to‘xtatgan.
Hujjatlarni ko‘zdan kechirish jarayonida transport vositasida Ma’muriy javobgarlik to‘g‘risidagi kodeksning 125¹-moddasi 4-qismida nazarda tutilgan huquqbuzarlik alomatlari aniqlanib, belgilangan tartibda ma’muriy bayonnoma rasmiylashtirish boshlangan.
Shu vaqtda haydovchi J.B. ma’muriy bayonnoma rasmiylashtirilmasligi evaziga inspektorga 1 million so‘m pora taklif qilgan. Inspektor bunday harakatlar jinoiy javobgarlikka sabab bo‘lishi mumkinligi haqida ogohlantirganiga qaramay, fuqaro noqonuniy taklifini davom ettirib, xizmat vazifasini bajarishga to‘sqinlik qilgan.
Shundan so‘ng holat yuzasidan Transport nazorati inspeksiyasi rahbariyati, korrupsiyaga qarshi kurashish bo‘yicha mas’ul xodim, Navoiy viloyati Ichki ishlar boshqarmasi hamda Transport prokuraturasiga zudlik bilan xabar berilgan.
O‘tkazilgan tezkor tadbir davomida haydovchi pora sifatida taklif qilgan pul mablag‘ining 700 ming so‘mini inspektorga berayotgan vaqtida huquqni muhofaza qiluvchi organlar xodimlari tomonidan ashyoviy dalillar bilan qo‘lga olingan.
Hozirda mazkur holat yuzasidan Jinoyat kodeksining tegishli moddalari asosida jinoyat ishi qo‘zg‘atilib, dastlabki tergov harakatlari olib borilmoqda.
