O‘zbekiston delegatsiyasi Eronda Ali Xomanaiy bilan vidolashuv marosimida qatnashadi
O‘zbekiston Oliy Majlisi Qonunchilik palatasi Spikeri Nuriddin Ismoilov boshchiligidagi delegatsiya 3-iyul kuni Eronga borib, marhum oliy rahbar Oyatulloh Ali Xomanaiy bilan vidolashuv marosimida ishtirok etadi.
O‘zbekiston delegatsiyasi marhum oliy rahbar Oyatulloh Ali Xomanaiy bilan vidolashuv marosimida ishtirok etish uchun 3-iyul kuni Eronga boradi. Bu haqda “Dunyo” axborot agentligi Eronning Tasnim agentligiga tayanib xabar berdi.
O‘zbekiston Tashqi ishlar vazirligidagi manbaga ko‘ra, delegatsiyaga O‘zbekiston Oliy Majlisi Qonunchilik palatasi Spikeri Nuriddin Ismoilov boshchilik qiladi.
Eron rasmiylari ma’lum qilishicha, Ali Xomanaiy bilan vidolashuv marosimlari 4–9-iyul kunlari o‘tkaziladi. Tadbirlarda 30 dan ortiq davlat delegatsiyalari hamda 90 dan ziyod mamlakatning diniy peshvolari qatnashishi kutilmoqda.
Vidolashuv marosimlari 4-iyul kuni Tehrondagi Mosalla majmuasida boshlanadi. 5-iyul kuni janoza namozi o‘qilib, poytaxtda ommaviy motam yurishi tashkil etiladi. Keyingi tadbirlar Qum va Mashhad shaharlarida, shuningdek, Iroqning Najaf va Karbalo shaharlarida davom etadi. Dafn marosimining yakuniy bosqichi 9-iyul kuni Mashhadda o‘tkazilishi rejalashtirilgan.
Eron rasmiylari motam tadbirlarida millionlab odamlar ishtirok etishini kutmoqda. Shu munosabat bilan Eron va Iroqda marosimlarni muvofiqlashtirish uchun maxsus shtablar tashkil etilgan.
