O‘zbekistonda magistraturaga qabul boshlandi
2026/2027-o‘quv yili uchun hujjatlar qabuli 1-iyuldan boshlandi. Arizalar 30-iyulga qadar onlayn tarzda qabul qilinadi.
O‘zbekistonda 2026/2027-o‘quv yili uchun davlat oliy ta’lim tashkilotlarining magistratura mutaxassisliklariga o‘qishga kirish bo‘yicha hujjatlar qabuli boshlandi.
Oliy ta’lim, fan va innovatsiyalar vazirligi ma’lum qilishicha, hujjatlar 1–30-iyul kunlari vazirlikning my.edu.uz platformasi orqali onlayn qabul qilinadi.
Magistratura mutaxassisliklariga tanlovda ishtirok etish uchun abituriyentlar tegishli darajadagi milliy yoki xalqaro chet tilini bilish sertifikatiga ega bo‘lishi lozim.
Hujjat topshirishda bakalavr diplomi hamda chet tilini bilish sertifikati talab etiladi. Magistraturaga kirish uchun talab etiladigan chet tili sertifikatlarining mutaxassisliklar kesimida ro‘yxati bilan havola orqali tanishish mumkin.
Shu bilan birga, ayrim toifadagi talabgorlar chet tili sertifikatini taqdim etishdan ozod etiladi. Bular qatoriga Prezident va nomli davlat stipendiyalari sohiblari, davlat mukofoti sovrindorlari, respublika fan olimpiadalari g‘oliblari, ko‘rish, eshitish yoki nutqida nuqsoni bo‘lgan shaxslar hamda bakalavriat ta’limini xorijiy tilda tamomlagan bitiruvchilar kiradi.
