Qashqadaryoda 4 kishi voyaga yetmagan qizni zo‘rlashda gumonlanmoqda
Jabrlanuvchiga psixologik yordam ko‘rsatilmoqda, holat yuzasidan jinoyat ishi qo‘zg‘atilgan.
Qashqadaryo viloyatining Yakkabog‘ tumanida voyaga yetmagan qizga nisbatan sodir etilgan zo‘ravonlik holati yuzasidan jinoyat ishi qo‘zg‘atilib, to‘rt nafar gumonlanuvchi protsessual tartibda qo‘lga olindi. Bu haqda Bolalar ombudsmani ma’lum qildi.
Qayd etilishicha, joriy yilning 7-iyun kuni voyaga yetmagan S. R. Yakkabog‘ tumani Ichki ishlar bo‘limiga murojaat qilgan. Mazkur murojaat asosida 8-iyun kuni Jinoyat kodeksining 128-moddasi bilan jinoyat ishi qo‘zg‘atilgan.
Dastlabki tergov davomida bir necha turdagi sud ekspertizalari tayinlanib, ularning xulosalariga ko‘ra, jinoyat ishi Jinoyat kodeksining 118-moddasi 3-qismi bo‘yicha qayta malakalangan. Shundan so‘ng X.D., X.Sh., N.O. va A.D. Jinoyat-protsessual kodeksining 221-moddasi tartibida ushlangan.
Hozirda jinoyat ishi yuzasidan Yakkabog‘ tumani IIB huzuridagi tergov guruhi tomonidan dastlabki tergov harakatlari davom ettirilmoqda.
Shuningdek, jabrlanuvchi voyaga yetmaganga “Inson” ijtimoiy xizmatlar markazi tomonidan psixologik yordam ko‘rsatilmoqda, uning oilasiga esa yuridik hamda ijtimoiy-psixologik qo‘llab-quvvatlash choralari tashkil etilgan.
Bolalar ombudsmani mazkur ish yuzasidan voyaga yetmagan jabrlanuvchining qonuniy manfaatlari va protsessual huquqlari ta’minlanishi ustidan nazoratni davom ettirayotganini bildirgan.
