Sog‘liqni saqlash vaziri korrupsiyaga qarshi kurash bo‘yicha murojaat bilan chiqdi
Vazirlik tibbiyot tizimida korrupsiyaviy xavflarni kamaytirish maqsadida "Raqamli komplayens", "Sirli mijoz" va sun’iy intellekt asosidagi nazorat tizimlarini ishga tushirmoqda.
Sog‘liqni saqlash vaziri Eldor Adilov fuqarolar va tibbiyot xodimlariga murojaat qilib, sog‘liqni saqlash tizimida korrupsiyaga qarshi kurashni kuchaytirish, ochiqlik va shaffoflikni ta’minlash bo‘yicha amalga oshirilayotgan islohotlar hamda kelgusidagi ustuvor vazifalar haqida ma’lumot berdi.
Vazir murojaatida korrupsiya mamlakat taraqqiyotiga jiddiy to‘siq bo‘layotgani, Prezident tomonidan u jamiyat tanasidagi "saraton" deya baholanganini eslatib, bu illatga qarshi murosasiz kurashish davlat siyosatining ustuvor yo‘nalishlaridan biri ekanini ta’kidlagan.
Qayd etilishicha, Prezidentning 2026-yil 5-maydagi farmoniga muvofiq vazirlik tizimi tubdan qayta tashkil etilmoqda. Markaziy apparat zamonaviy fikrlaydigan, professional va malakali mutaxassislar bilan to‘ldirilmoqda. Shuningdek, ilk bor korrupsiyaga qarshi kurashish va komplayens masalalari bo‘yicha vazir o‘rinbosari lavozimi joriy etilib, ichki nazorat bo‘linmasi Komplayens va korrupsiyaga qarshi ichki nazorat boshqarmasiga aylantirilgan.
Ma’lum qilinishicha, korrupsiyaviy xavflarni barvaqt aniqlash maqsadida masofaviyaudit.uz avtomatlashtirilgan axborot tizimi orqali joriy yilning dastlabki besh oyida vazirlik tizimidagi tashkilotlarda 979 ta holatda 514,9 milliard so‘mlik moliyaviy xato va kamchiliklar aniqlanib, o‘z vaqtida bartaraf etilgan.
Shuningdek, tug‘uruq muassasalarida noqonuniy "suyunchi" pullari yoki kesarcha kesish amaliyoti uchun noqonuniy to‘lov talab qilinishining oldini olish maqsadida barcha tug‘uruq komplekslari va tibbiyot muassasalarida "Sirli mijoz" tizimi joriy etilgani ma’lum qilingan.
Ushbu chora-tadbirlar natijasida Korrupsiyaga qarshi kurashish agentligi tomonidan tuziladigan Ochiqlik indeksida Sog‘liqni saqlash vazirligi 87,2 ball to‘plab, 97 ta davlat tashkiloti orasida birdaniga 60 pog‘ona yuqorilab, ilk bor "yashil" toifaga kirgani qayd etilgan.
Shuningdek, 2026-yil 1-iyuldan boshlab "Raqamli komplayens" axborot dasturiy kompleksi sinov tariqasida ishga tushirilishi, korrupsiyaga qarshi ichki nazorat tizimi "E-Komplayens" elektron moduli orqali to‘liq raqamlashtirilishi hamda sun’iy intellekt texnologiyalari yordamida korrupsiyaviy xavflarni erta aniqlash mexanizmlari joriy etilishi rejalashtirilayotgani bildirilgan.
Murojaat yakunida vazir fuqarolarni sog‘liqni saqlash tizimidagi korrupsiyaviy holatlar, manfaatlar to‘qnashuvi, noqonuniy to‘lovlar, byurokratik to‘siqlar yoki boshqa qonunbuzarliklar haqida vazirlikning 1203 qisqa raqamli "Ishonch telefoni" hamda info@ssv.uz elektron pochta manzili orqali xabar berishga chaqirdi.
Ta’kidlanishicha, har bir murojaat belgilangan tartibda tezkor ko‘rib chiqiladi, murojaatchining shaxsi va taqdim etilgan ma’lumotlarning maxfiyligi kafolatlanadi hamda aniqlangan qonunbuzarliklar yuzasidan tegishli choralar ko‘riladi.
