Qamchibek Tashiyev 4 yilga qamaldi

2-iyul kuni Qirg‘izistonning Birinchi may tuman sudi "75 maktub" ishi bo‘yicha hukm chiqardi. Bu haqda Akipress xabar berdi.

 

Ma’lum qilinishicha, sud barcha sudlanuvchilarni mansab vakolatini suiiste’mol qilish moddasi bo‘yicha aybsiz deb topdi. Shu bilan birga, hokimiyatni zo‘ravonlik yo‘li bilan egallash ayblovi bo‘yicha Qamchibek Tashiyev, Kurmankul Zulushev, Nurlanbek Turgunbek uulu, Kursan Asanov, Aaly Karashev, Emilbek Uzakbayev, Bekbolot Talgarbekov va Kurmanbek Diykanbayev mol-mulki musodara qilingan holda 4 yil muddatga ozodlikdan mahrum etildi.

 

Biroq sud ularga nisbatan probatsiya qo‘lladi. Natijada barcha mahkumlarga 3 yil muddatga probatsiya nazorati belgilandi. Bundan tashqari, hibsda saqlanayotgan besh nafar sudlanuvchi sud zalidan ozod qilindi. Ularga nisbatan  qamoq ehtiyot chorasi mamlakat hududini tark etmaslik to‘g‘risidagi tilxat bilan almashtirildi.

 

Mazkur ish siyosatchilar va jamoat arboblari guruhi tomonidan muddatidan oldin prezidentlik saylovlarini o‘tkazishga chaqirilgan murojaat — "75 maktub" bilan bog‘liq. Murojaat e’lon qilinganidan so‘ng Qirg‘izistonda qator kadrlar almashinuvi yuz bergan. Jumladan, Qamchibek Tashiyev Vazirlar Mahkamasi raisi o‘rinbosari va Milliy xavfsizlik davlat qo‘mitasi raisi lavozimidan ozod etilgan.

 

Ish bo‘yicha sobiq Milliy xavfsizlik davlat qo‘mitasi rahbari Qamchibek Tashiyev, deputat Kurmankul Zulushev, Jogorku Kenesh spikeri Nurlanbek Turgunbek uulu, shuningdek, Bekbolot Talgarbekov, Emilbek Uzakbayev, Aaly Karashev, Kurmanbek Diykanbayev va Kursan Asanov sudlanuvchi sifatida jalb etilgan.

 

Ular hokimiyatni zo‘ravonlik yo‘li bilan egallashga tayyorgarlik ko‘rishda ayblangan. Qamchibek Tashiyevga nisbatan, shuningdek, mansab vakolatini suiiste’mol qilish ayblovi ham ilgari surilgan.

 

Avvalroq davlat ayblovchisi ish bo‘yicha barcha ayblanuvchilarni 9 yil muddatga ozodlikdan mahrum etishni so‘ragan edi. Sudlanuvchilar esa so‘nggi so‘zida suddan oqlov hukmi chiqarishni so‘ragan.