“Eron AQShning deyarli barcha talablariga rozi bo‘ldi” — Tramp
AQSh prezidenti Eron bilan muzokaralarda muhim siljish kuzatilayotganini bildirib, yakuniy kelishuvga yaqin qolinganini aytdi.
AQSh prezidenti Donald Tramp Eron bilan davom etayotgan muzokaralarda sezilarli natijalarga erishilganini bildirib, Tehron Vashington ilgari surgan deyarli barcha shartlarga rozi bo‘lganini ma’lum qildi.
CNBC telekanaliga bergan intervyusida Tramp hozirda tomonlar o‘rtasida muzokaralar davom etayotganini qayd etib, yakuniy natija yaqin kunlarda ma’lum bo‘lishi mumkinligini ta’kidladi.
“Biz muzokaralar olib boryapmiz. Menimcha, ular bizga kerak bo‘lgan deyarli barcha narsaga rozi bo‘lishdi”, — degan AQSh prezidenti.
Shuningdek, Tramp AQSh Eron bilan uzoq davom etadigan harbiy mojaroga kirishni istamasligini bildirib, qisqa muddat ichida harbiy maqsadlarga erishilganini ta’kidlagan.
Uning so‘zlariga ko‘ra, AQSh Eronning harbiy salohiyatiga jiddiy zarba bergan va zarurat tug‘ilganda qolgan imkoniyatlarini ham yo‘q qilishga qodir.
Eslatib o‘tamiz, iyun oyida AQSh va Eron o‘rtasidagi qarama-qarshilik keskinlashganidan so‘ng Qatar vositachiligida bilvosita muzokaralar boshlangan edi. Sulh e’lon qilinganiga qaramay, tomonlar bir-birini kelishuvni buzishda ayblagan, biroq keyinchalik muzokaralarni davom ettirishga kelishib olgan.
