Pedagog ayollar uchun voleybol musobaqasi: g‘oliblarga “Damas” va millionlab mukofotlar
Pedagog ayollar o‘rtasidagi ilk respublika voleybol musobaqasi final bosqichi Namangan shahrida davom etmoqda.
O‘zbekistonda ilk bor maktabgacha va maktab ta’limi tizimida faoliyat yuritayotgan pedagog xotin-qizlar o‘rtasida voleybol bo‘yicha “Maktabgacha va maktab ta’limi vaziri kubogi” musobaqasi o‘tkazilmoqda.
Musobaqa respublika bo‘ylab 14 mingdan ortiq ta’lim muassasasida faoliyat yuritayotgan 110 ming 452 nafar ayol pedagogni qamrab oldi. Saralash bosqichlarida g‘olib bo‘lgan jamoalar ishtirokidagi respublika final bosqichi ayni kunlarda Namangan shahrida bo‘lib o‘tmoqda.
Unda Qoraqalpog‘iston Respublikasi, Toshkent shahri va barcha viloyatlardan hududiy bosqich g‘olibi bo‘lgan 14 ta jamoa tarkibidagi 112 nafar ayol pedagog g‘oliblik uchun bahs olib bormoqda.
Musobaqa yakunlariga ko‘ra, g‘olib va sovrindor jamoalar quyidagi pul mukofotlari bilan taqdirlanadi:
-
1-o‘rin — 150 million so‘m;
-
2-o‘rin — 100 million so‘m;
-
3-o‘rin — 70 million so‘m.
Shuningdek, musobaqa g‘oliblari tarkibidagi har bir ishtirokchiga “Damas” avtomobili topshirilishi belgilangan.
