Toshkentda o‘z joniga qasd qilishga uringan yigit qutqarib qolindi
Uchtepa tumanida patrul-post xizmati xodimi va IIV Akademiyasi kursanti Bo‘zsuv kanaliga tushib ketgan yigitni suvdan olib chiqdi.
Toshkentning Uchtepa tumanida patrul-post xizmati xodimi va IIV Akademiyasi kursanti Bo‘zsuv kanaliga tushib ketgan yigitni qutqarib qoldi. Bu haqda IIV Jamoat xavfsizligi departamenti xabar berdi.
Hodisa 2-iyul kuni soat taxminan 16:30 da Uchtepa tumani hokimligi binosi oldida o‘tkazilayotgan yoshlar festivali vaqtida sodir bo‘lgan.
Jamoat tartibini saqlashga jalb qilingan ichki ishlar organlari xodimlari patrullik olib borayotgan vaqtda hokimlik binosi ortidan oqib o‘tuvchi Bo‘zsuv kanalidan suv shovqinini eshitgan. Voqea joyiga yetib borgan Uchtepa tumani IIB patrul-post xizmati xodimi, oddiy askar N. Po‘latbekov hamda IIV Akademiyasining 2-bosqich kursanti D. Xayrullayev kanalga tushib ketayotgan yigitni ko‘rib, uni suvdan olib chiqqan.
Jabrlanuvchiga birinchi tibbiy yordam ko‘rsatilgan. Shundan so‘ng tez tibbiy yordam brigadasi uni shifoxonaga olib ketgan.
Dastlabki tekshiruvda aniqlanishicha, fuqaro internet orqali tashkil etilgan azartli o‘yinlarda katta miqdorda pul yo‘qotganidan so‘ng o‘z joniga qasd qilishga uringan. Holat yuzasidan tegishli tekshiruv ishlari olib borilmoqda.
