O'zbekistonda oliy ta’limda yangi ta’lim yo‘nalishlari va mutaxassisliklar joriy etildi
Endilikda OTMlarda dronlar, mobil robototexnika, yashil iqtisodiyot, urbanistika, xalqaro suv diplomatiyasi va boshqa zamonaviy yo‘nalishlar bo‘yicha ham mutaxassislar tayyorlanadi.
O‘zbekistonda oliy ta’lim yo‘nalishlari va mutaxassisliklari klassifikatoriga o‘zgartirish va qo‘shimchalar kiritildi. Bu Oliy ta’lim, fan va innovatsiyalar vazirining buyrug‘i bilan tasdiqlanib, Adliya vazirligida davlat ro‘yxatidan o‘tkazildi.
Qayd etilishicha, o‘zgarishlardan ko‘zlangan asosiy maqsad oliy ta’lim tizimini zamonaviy mehnat bozori talablariga moslashtirish hamda iqtisodiyotning istiqbolli tarmoqlari uchun raqobatbardosh mutaxassislar tayyorlashdan iborat.
Hujjatga muvofiq, bakalavriat bosqichida ekologiya va atrof-muhit, yashil iqtisodiyot, iqlim o‘zgarishi, qayta tiklanuvchi energiya, suv resurslarini boshqarish, mobil robototexnika, uchuvchisiz uchish apparatlari (dronlar), barqaror qishloq xo‘jaligi, ekoturizm hamda temir yo‘l muhandisligi ta’lim yo‘nalishlari joriy etildi.
Magistratura bosqichida esa xalqaro energetik siyosat, xalqaro suv diplomatiyasi, sirkulyar iqtisodiyot, barqaror moliya, rivojlanish iqtisodiyoti, ekologiya huquqi, xalqaro savdo huquqi, nazariy va muhandislik fizikasi, urbanistika, barqaror shaharsozlik, iqlimga chidamli o‘rmon xo‘jaligi hamda barqaror turizm mutaxassisliklari ochildi.
Bundan tashqari, klassifikatorga yana bir qator o‘zgartirishlar kiritildi. Xususan, bakalavriatning 760-pozitsiyasidagi yo‘nalish “Xizmat faoliyatini tarbiyaviy-psixologik ta’minlash” deb qayta nomlandi. Magistraturaning 766-pozitsiyasidagi mutaxassislik “Davlat va harbiy boshqaruv” nomi bilan tasdiqlandi, 799-pozitsiya esa klassifikatordan chiqarildi.
