Rossiya Ukrainaga havo hujumlari uyushtirdi: qurbonlar bor
Hujumlar oqibatda ko‘p qavatli uy, do‘kon va yo‘l infratuzilmasiga zarar yetgan.
Rossiya Qurolli kuchlari Ukrainaning Sumi shahriga aviabombalar va dronlar yordamida hujum uyushtirdi. Hujum oqibatida kamida 4 kishi halok bo‘lgan, yana 27 kishi, jumladan 7 nafar bola jarohat olgan.
Sumi viloyati harbiy ma’muriyati rahbari Oleg Grigorovning ma’lum qilishicha, zarbalardan biri shaharning Kovpakovskiy tumanidagi turar joy hududiga kelib tushgan. Oqibatda ko‘p qavatli uy, do‘kon va yo‘l infratuzilmasiga zarar yetgan.
Rasmiylarga ko‘ra, halok bo‘lganlar orasida 5 yoshli qizaloq va uning onasi ham bor. Shuningdek, og‘ir jarohat olgan fuqarolardan biri shifoxonada vafot etgan.
Shu bilan birga, Rossiya kuchlari Zaporijjya shahriga ham raketa va dronlar bilan zarba bergan. Zaporijjya viloyati harbiy ma’muriyati rahbari Ivan Fedorovning bildirishicha, hujum oqibatida turar joy va sanoat obyektlari zarar ko‘rgan.
Dastlabki ma’lumotlarga ko‘ra, Zaporijjyadagi hujum natijasida 2 kishi halok bo‘lgan, yana 21 kishi turli darajadagi tan jarohatlari olgan.
