Yevropadagi jazirama qurbonlari soni 3 700 nafarga yetdi
Eng ko‘p o‘lim holati Fransiyada qayd etilgan.
Iyun oyida G‘arbiy Yevropani qamrab olgan anomal issiq to‘lqini oqibatida Fransiya, Belgiya va Niderlandiyada kamida 3 700 ta ortiqcha o‘lim qayd etildi. Bu haqda Reuters agentligi ushbu davlatlar sog‘liqni saqlash idoralari ma’lumotlariga tayanib xabar berdi.
Ma’lumotlarga ko‘ra, eng ko‘p o‘lim holati Fransiyada kuzatilgan. Mamlakatda 22–28-iyun kunlari jazirama tufayli 2 025 kishi vafot etgan. Belgiyada 18–29-iyun kunlari 1 200 ga yaqin, Niderlandiyada esa 480 ga yaqin ortiqcha o‘lim qayd etilgan.
Qurbonlarning asosiy qismini yoshi katta fuqarolar tashkil etgani aytilmoqda. Fransiya Sog‘liqni saqlash vazirligi ma’lumotiga ko‘ra, jazirama davrida mamlakatda umumiy o‘lim ko‘rsatkichi qariyb 30 foizga oshgan.
Issiqlik to‘lqini G‘arbiy Yevropaning boshqa davlatlariga ham jiddiy ta’sir ko‘rsatdi. Xususan, Germaniyaning ayrim hududlarida suv tanqisligi sabab favqulodda holat e’lon qilingan. Mahalliy hokimiyatlar suv resurslarini tejash maqsadida favvoralar faoliyatini cheklash, avtomobillarni yuvish va basseynlarni to‘ldirishdan vaqtincha voz kechishni tavsiya qilmoqda.
Eslatib o‘tamiz, iyun oyining oxirida G‘arbiy Yevropada kuzatilgan anomal issiq davrida Fransiyaning Palluo kommunasida havo harorati 43,8 darajagacha ko‘tarilib, tarixiy rekord qayd etilgan.
