Mujtabo Xomanaiy otasining dafn marosimida qatnashmadi
Bunga xavfsizlik bilan bog‘liq tahdidlar sabab bo‘lgan.
Eronda marhum oliy rahbar Ali Xomanaiyning dafn marosimlari davom etmoqda. Besh shaharda o‘tkazilayotgan vidolashuv marosimlari 9-iyulgacha davom etishi rejalashtirilgan.
Biroq hozirga qadar amaldagi oliy rahbar Mujtabo Xomanaiy otasi bilan vidolashuv marosimlarida ko‘rinmadi, deya xabar bermoqda Nur.kz The New York Times'ga tayanib.
Ali Xomanaiyning dafn marosimini tashkil etish qo‘mitasi rahbari Akbar Purjamshidiyon avvalroq Mujtabo Xomanaiyning marosimda ishtirok etishi masalasi uning vakolatiga kirmasligini bildirgan.
The New York Times nashrining Eron Islom inqilobi qo‘riqchilari korpusining ikki nafar anonim xodimiga tayanib yozishicha, Mujtabo Xomanaiyning xavfsizlik xizmati Isroil tomonidan ehtimoliy suiqasd uyushtirilishi yoki uning harakatlanish yo‘nalishi orqali yashirin joyi aniqlanishi mumkinligi haqidagi xavotirlar sabab uning marosimda qatnashishiga ruxsat bermagan.
Nashr ma’lumotiga ko‘ra, Mujtabo Xomanaiy dafn marosimining ayrim qismlarida ishtirok etishni istagan. Xususan, u 9-iyul kuni Mashhad shahridagi Imom Rizo ziyoratgohida bo‘lib o‘tadigan marosimda qatnashib, otasi uchun janoza duosini o‘qishni rejalashtirgan.
Hozircha Eron rasmiylari Mujtabo Xomanaiyning dafn marosimida qatnashmagani yuzasidan rasmiy bayonot bergani yo‘q.
