Texnikum bitiruvchilari uchun OTMlarga 2-kursdan suhbat asosida qabul boshlandi
Qabul jarayoni onlayn shaklda o‘tkaziladi. Hujjat topshirishda diplomning asl nusxasini taqdim etish talab etilmaydi.
5-iyuldan boshlab texnikumlarni muvaffaqiyatli tamomlagan bitiruvchilarni oliy ta’lim muassasalarining bakalavriat ta’lim yo‘nalishlariga 2-kursdan suhbat asosida o‘qishga qabul qilish uchun arizalar qabuli boshlandi. Bu haqda Oliy ta’lim, fan va innovatsiyalar vazirligi xabar berdi.
Arizalar 25-iyulga qadar (shu kuni ham) my.edu.uz platformasi orqali onlayn qabul qilinadi. Ro‘yxatdan o‘tishda abituriyentlardan diplomning asl nusxasi talab etilmaydi. Faqat shaxsni tasdiqlovchi ma’lumotlarni kiritish kifoya bo‘lib, qolgan zarur ma’lumotlar axborot tizimi tomonidan avtomatik shakllantiriladi.
Mazkur tartib texnikumni muvaffaqiyatli tamomlagan bitiruvchilarga tatbiq etiladi. Bunday toifaga o‘quv semestrlari yakunlariga ko‘ra baholari asosan 4 va 5 bo‘lgan hamda baholarining kamida 50 foizi (tibbiyot yo‘nalishlarida esa kamida 85 foizi) "5" bahoni tashkil etgan bitiruvchilar kiradi.
Suhbat natijalariga ko‘ra, oliy ta’lim tashkiloti komissiyasi tomonidan qo‘yilgan ballarning o‘rtacha ko‘rsatkichi 67 ball va undan yuqori bo‘lgan abituriyentlar suhbatdan o‘tgan deb hisoblanadi hamda to‘lov-kontrakt asosida 2-kursdan talabalikka tavsiya etiladi.
Ushbu tartib oliy harbiy va oliy harbiylashtirilgan ta’lim muassasalari, Toshkent davlat yuridik universiteti, shuningdek O‘zbekistonda faoliyat yuritayotgan xorijiy va nodavlat oliy ta’lim tashkilotlari hamda ularning filiallariga nisbatan qo‘llanilmaydi.
