Toshkentda yo‘lovchi bagajidan 7 kgdan ortiq sintetik giyohvandlik vositasi topildi
Mazkur modda quruq sut qadoqlariga yashirilgan bo‘lib, qo‘shni davlat fuqarosi yukni 1000 AQSH dollari evaziga yetkazib berishga rozi bo‘lgan.
Pxuketdan uchib kelgan 19 yoshli qo‘shni davlat fuqarosining bagajidan mefedron sintetik giyohvandlik vositasi topildi. Bu haqda Bojxona qo‘mitasi raisining matbuot kotibi Husan Tangriyev xabar berdi.
Ma’lum qilinishicha, yo‘lovchining bagaji bojxona ko‘rigidan o‘tkazilganda, yuklar orasidagi qadoqlangan quruq sut mahsulotlari bojxona xodimlarida shubha uyg‘otadi.
Markaziy bojxona laboratoriyasida o‘tkazilgan ekspertiza natijasida 10 ta qadoq ichidagi modda quruq sut emas, balki umumiy og‘irligi 7 kilogramm 180 gramm bo‘lgan mefedron sintetik giyohvandlik vositasi ekani aniqlandi.
Dastlabki ma’lumotlarga ko‘ra, yo‘lovchi ushbu narkotiklarni “Telegram” messenjeri orqali tanishgan noma’lum shaxsning ko‘rsatmasi bilan 1000 AQSH dollari evaziga Toshkent shahriga yetkazib berish uchun olib kelgan.
Holat yuzasidan tegishli tartibda surishtiruv va tergov harakatlari olib borilmoqda.
Qayd etilishicha, narkotiklarni uyushgan guruh tomonidan transmilliy usulda yoki Internet tarmog‘i orqali o‘tkazish uchun javobgarlik belgilangan va bu 15-yildan 20-yilgacha ozodlikdan mahrum qilish bilan jazolanadi.
