O‘zbekistonda birinchi Xalqaro islom sivilizatsiyasi forumi o‘tkaziladi
Forumda 50 dan ortiq mamlakatdan 300 ga yaqin xorijiy mehmon ishtirok etishi kutilmoqda
2026-yil 7–11-iyul kunlari Toshkent, Samarqand va Termiz shaharlarida I Xalqaro islom sivilizatsiyasi forumi bo‘lib o‘tadi. Shu munosabat bilan O‘zbekistondagi Islom sivilizatsiyasi markazida forumga bag‘ishlangan "Tinchlik, bag‘rikenglik va ilm-ma’rifat yo‘li" mavzusida brifing tashkil etildi.
Brifingda 7–11-iyul kunlari Toshkent, Samarqand va Termiz shaharlarida bo‘lib o‘tadigan forum dasturi haqida ommaviy axborot vositalari vakillariga batafsil ma’lumot taqdim etildi.
Ma’lum qilinishicha, forum O‘zbekistondagi Islom sivilizatsiyasi markazi, O‘zbekiston Respublikasi Din ishlari bo‘yicha qo‘mitasi, Imom Moturidiy, Imom Buxoriy va Imom Termiziy xalqaro ilmiy-tadqiqot markazlari, O‘zbekiston musulmonlari idorasi, O‘zbekiston xalqaro islomshunoslik akademiyasi hamda Islom olami ta’lim, fan va madaniyat masalalari bo‘yicha tashkiloti (ICESCO) hamkorligida tashkil etilmoqda.
Forumda 50 dan ortiq mamlakatdan 300 ga yaqin xorijiy mehmon ishtirok etishi kutilmoqda. Ular orasida davlat va jamoat arboblari, vazirlar, muftiylar, akademiklar, taniqli islomshunos olimlar, qo‘lyozmashunoslar, muzey va kutubxonalar rahbarlari, nufuzli xalqaro tashkilotlar hamda ommaviy axborot vositalari vakillari bor. Bu esa forumning xalqaro muloqot va akademik hamkorlik maydoniga aylanishi kutilayotganidan dalolat beradi.
Qayd etilishicha, I Xalqaro islom sivilizatsiyasi forumi tinchlik, bag‘rikenglik va ilm-ma’rifat g‘oyalarini keng targ‘ib etish, shuningdek, O‘zbekistonning boy ilmiy va ma’naviy merosini xalqaro hamjamiyatga yana bir bor namoyon etish uchun muhim xalqaro maydon bo‘lishi kutilmoqda.
